“مه‌هزه‌له‌که‌ی” د. کامه‌ران مه‌نتک و چه‌ند قسه‌یه‌ك. ئاسۆی حه‌سه‌ن زاده
سەرچاوە لاپەرەی تایبەت بە د. ئاسۆ حەسەن‌زادە، فەیسبووک
له‌کاتێكدا له واده‌ی دیاریکراو له‌لایه‌ن کۆماری ئیسلامییه‌وه به‌دژی حیزبه‌کانی رۆژههڵاتی کوردستان نزیک ده‌بینه‌وه، دوکتور کامه‌ران مه‌نتک مامۆستای مێژوو له زانکۆی سه‌ڵاحه‌دین له لاپه‌ڕ‌ه‌ی فه‌یسبووکی خۆیدا بابه‌تێکی له‌ژێر ناوی “ئۆپۆزیسیۆنی چه‌کداری له رۆژههڵاتی وڵات: ئه‌و مه‌هزه‌له‌یه‌ی ده‌بێت براکانمان له رۆژهه‌ڵات لێی وشیار بنه‌وه” بڵاو کردۆته‌وه. له‌و شوێنه که چاوه‌ڕوان ده‌کرا ڕووناکبیرانی باشوور هاووڵاتییان بۆ وه‌ده‌نگ هاتن له سه‌روه‌ری و سه‌قامگیریی هه‌رێم و داکۆکی له گیانی خوشک و برا رۆژهه‌ڵاتییه‌كانیان هان بده‌ن، ئه‌و به‌ڕێزه به‌حیساب هه‌وڵی داوه خه‌ڵکی رۆژهه‌ڵاتیش له‌و حیزبانه بکا!
بێ‌لوتفی و چه‌واشه‌کارییه‌کانی نێو ئه‌و بابه‌ته ده‌رهه‌ق به بزوتنه‌وه‌ی رۆژهه‌ڵات ئه‌وه‌نده زه‌قن که لێره‌دا شیاوی وڵامدانه‌وه نین. هاوکات له‌به‌ر ئه‌وه‌ی به‌ئاسایی کردنی ئه‌م جۆره روانینه بۆ خه‌باتی پارچه‌ی دیکه‌ی کوردستان ده‌توانێ که‌سانی بێ‌ئاگا له داوی کۆماری ئیسلامی بخا، بێده‌نگه لێکردنیشی دروست نیه. به‌تایبه‌ت که نووسه‌ری بابه‌ته‌که به‌ئه‌نقه‌ست هه‌وڵی داوه هاوشێوه‌سازییه‌ک له‌نێوان حیزبه سیاسییه‌کانی رۆژهه‌ڵات له‌گه‌ڵ ئه‌وانه‌ی باشووری کوردستاندا بکا بۆ ئه‌وه‌ی هه‌ر که‌س له باشوور له حکومه‌تی هه‌رێمی کوردستان تووڕه بوو، له حیزبه سیاسییه‌كانی رۆژهه‌ڵاتیشی دڕدۆنگ بکا.
ئه‌وه‌نده‌ی ده‌گه‌ڕێته‌وه سه‌ر ره‌خنه‌کانی ناوبراو له قه‌واره و حیزبه‌کانی باشووری کوردستان ئه‌وه بابه‌تێکه که پێوه‌ندیی به تێکۆشه‌رانی رۆژههڵاتهوه نیه، چونکه به‌رژه‌وه‌ندیی کورد له‌وه‌دایه که هه‌ر پارچه‌یه‌کی کوردستان بۆخۆی شه‌ن و که‌وی کێشه‌کانی خۆی بکا و دروست نیه هیچ پارچه‌یه‌کی کوردستان ده‌ست له کاروباری پارچه‌یه‌کی دیکه وه‌ربدا. له‌و شوێنه‌شدا که پێویسته پارچه‌كانی کوردستان هاوکار و پشتیوانی یه‌كتر بن به‌تایبه‌تی ئه‌گه‌ر هات و به‌رژه‌وه‌ندییه‌کانی دوو پارچه‌ی کوردستان به‌ر یه‌ک که‌وتن، هه‌ق وایه به رووحی نه‌ته‌وه‌یی و به شێوه‌یه‌كی هاوسه‌نگ و به‌رپرسیارانه رێکار و رێگاچاره بدۆزرێنه‌وه.
د. کامه‌ران مه‌نتک ڕه‌خنه له‌وه ده‌گرێ که له سه‌رده‌می ئێستادا خه‌ڵک له کوردستان ته‌نیا گوێ له پروپاگاندای مێدیایی ده‌گرن به‌بێ ئه‌وه‌ی به‌دوای ورده‌کاریی پرسه‌کاندا بچن و بۆخۆیان بیر بکه‌نه‌وه، که‌چی بۆخۆی له حاڵێکدا مامۆستای مێژوویه، به‌بێ هیچ زانیاری و به‌دواداچوونێك وه‌نێو بابه‌ته‌که که‌وتووه و ته‌نانه‌ت شتی وه‌ها ناڕاست و ناڕه‌وای نووسیوه که خوێنه‌ر ئاره‌زوو ده‌خوازێ له‌ڕووی بێ‌ئاگاییه‌وه بێ. بۆ نموونه ناوبراو ته‌نیا هێمای هاوبه‌شی کوردی هه‌ر چوار پارچه واته کۆماری کوردستان به کۆماری مه‌هاباد ناو ده‌با و ده‌ڵێ “ئه‌و کۆماره زۆر له‌خۆی گه‌وره‌تر کراوه”، یان زیاتر له ساڵێک پاش یه‌كگرتنه‌وه‌ی ریزه‌كانی حیزبی دێموکڕات ئه‌و حیزبه لۆمه ده‌كا که هێشتا یه‌کی نه‌گرتۆته‌وه!
کرۆکی بابه‌ته‌كه‌ی ناوبراو ئه‌وه‌یه که به وته‌ی ئه‌و بزوتنه‌وه‌ی سیاسیی رۆژههڵاتی کوردستان هیچ پێوه‌ندییه‌كی به بزوتنه‌وه‌ی نه‌ته‌وه‌یی و نیشتمانیی کورده‌وه نیه، به‌ڵکوو بزوتنه‌وه‌یه‌كی فیئۆداله که له‌ودا منداڵه ئاغا و ده‌ره‌به‌گه‌کانی نێو حیزبه به قه‌ولی ئه‌و کلاسیکه‌کانی رۆژههڵاتی کوردستان یاری به هه‌ست و سۆزی نه‌ته‌وه‌یی تاکی کورد ده‌که‌ن و زوڵم و زۆری رێژیمه یه‌ك له‌دوای یه‌که‌کانی ئێران له‌پێناو به‌رژه‌وه‌ندییه‌کانی خۆیان و بۆ بازرگانی و مشه‌خۆری به‌کار ده‌به‌ن، منداڵی خه‌ڵک به کوشت ده‌ده‌ن و بوون به کارتێکی فشار بەدەستی ئێرانەوە بۆ تێکدانی باشووری کوردستان. (هه‌موو ئه‌م ده‌ربڕینانه هی نووسه‌ری بابه‌ته‌كه‌ن و شتی زۆر له‌وانه زبرتریشی له‌سه‌ر حیزبه‌کانی رۆژهه‌ڵات نووسیوه).
وه‌ک گوترا بێ‌‌ئینسافی و بێبنه‌مایی ئه‌م قسانه له‌وه ڕوونتره که پێویست به وڵامدانه‌وه بێ. بهڵام به‌ڕاستی جێگای پرسیاره که چۆنه رێک له سه‌روبه‌ندی ته‌واو بوونی واده‌ی دیاریکراو له‌لایه‌ن کۆماری ئیسلامییه‌وه بۆ به ئامانج گرتنی پێشـمه‌رگه و منداڵی پێشمه‌رگه‌ی رۆژهه‌ڵات، مامۆستایه‌كی زانکۆ له باشووری کوردستان به‌بێ له‌به‌رچاوگرتنی ماهیه‌تی پاک و رابردووی خه‌باتگێڕانه‌ی حیزبی دیموکڕات و حیزبه‌کانی دیکه‌ی رۆژهه‌ڵات و پێویستیی پشت و په‌نابوونیان له‌م کاته هه‌ستیاره‌دا، به‌م زمان و روانگه‌یه‌وه هه‌ڵ ده‌کوتێته سه‌ریان، له‌حاڵێکدا که ده‌زانێ هه‌م به‌ر له شۆڕشی ژینا و هه‌م به‌تایبه‌تی له په‌راوێزی ئه‌و شۆرشه‌دا ئه‌و حیزبانه و به‌تایبه‌تی حیزبی دێموکڕات چه‌نده بوونه‌ته ئامانجی پیلان و هێرشه‌کانی کۆماری ئیسلامی و له‌نێو قوربانییه‌كانی ئه‌م پیلان و هێرشانه‌شدا به شێوه‌ی رێژه‌یی ئه‌وه‌نده‌ی به قه‌ولی د. مه‌نتک کوڕی خه‌ڵک هه‌یه، ئه‌وه‌نده‌ش ئه‌ندامی سه‌رکردایه‌تی هه‌‌ن. سه‌رنجڕاکێشه به حیزبوڵڵای لوبنان سه‌رسام بی که‌چی خه‌بات و به‌رخۆدانی به‌ڕابردووترین حیزبی گه‌له‌که‌ی خۆت نه‌بینی.
پاشان ناوبراو که پارته‌کانی رۆژهه‌ڵات به‌وه تاوانبار ده‌کا که بوونه‌ته کارتی ده‌ستی کۆماری ئیسلامی بۆ تێکدانی هه‌رێمی کوردستان، له خۆی ناپرسێ کە داخوا مەبەستی ئەو رێژیمە لە خوڵقاندنی ئەو دۆخە چیە و خودی ئه‌و دوژمنایه‌تییه‌ی کۆماری ئیسلامی له‌گه‌ڵ هه‌رێمی کوردستانیش له‌سه‌ر چیه؟ که‌س هه‌یه نه‌زانێ که له چه‌ندین ساڵ پێش شۆڕشی ژیناشه‌وه ئه‌و رێژیمه چه‌نده له رێگای به‌غداوه له هه‌موو ده‌رفه‌تێک بۆ لاوازکردنی قه‌واره‌ی هه‌رێم کەڵکی وەرگرتوە و ئامراز و بیانووه‌کانی ئه‌م هه‌وڵی لاوازکردنه‌ش هیچ پێوه‌ندیی به حیزبه‌کانی رۆژههڵاتهوه نه‌بووه؟
که‌س نکوولی له که‌موکوڕییه‌کانی بزوتنه‌وه‌ی کورد له رۆژهه‌ڵات و پێویستیی گرتنه پێشی ستراتژییه‌كی روونتر و قایمتری خه‌بات له‌لایه‌ن حیزبه‌كانی ئه‌و به‌شه‌ی کوردستانه‌وه ناکا. بهڵام دوکتور مه‌نتک ده‌بێ ئه‌وه‌شی له‌به‌رچاوبێ که دۆخی ئێستای پارته‌کانی رۆژهه‌ڵات له باشوور تا ڕاده‌یه‌کی زۆریش بۆ ئه‌وه ده‌گه‌ڕێته‌وه که ئه‌و حیزبانه هه‌میشه هه‌وڵیان داوه به‌رژه‌وه‌ندییه‌کانی هه‌رێمی کوردستان له‌به‌رچاو بگرن.
هه‌روه‌ها که‌س لاریی له‌وه نیه که نه‌ک هه‌ر کوردی رۆژهه‌ڵات به‌ڵکوو هه‌موو کورد به قه‌ولی ناوبراو پێویستیی به مۆدێلێكی تر له کوردایه‌تی و یه‌کێتیی نه‌ته‌وه‌یی هه‌یه. بۆ گه‌یشتن به وه‌ها مۆدێل و یه‌كگرتنێک زۆر شت پێویستن که لێره‌دا جێگای باسکردنی نیه، بهڵام زۆر شتیش ده‌بێ وه‌لا بنرێن که یه‌كێکیان ئه‌و ئه‌قلیه‌ته‌یه که دوکتور مه‌نتک بابه‌ته‌كه‌ی پێ نووسیوه.
به‌خۆشییه‌وه هاوپێوه‌ندیی نێوان کوردی باشوور و رۆژهه‌ڵات له‌وه پته‌وتر و به‌ڕابردووتره و “عه‌لی مه‌حموود”ه‌کانی باشووریش ژماره‌یان له‌وه زۆرتره که ئه‌و هاوپێوه‌ندییه به‌و جۆره قسه و نووسینانه خه‌وشدار بێ. ئاره‌زوو ده‌خوازم دوکتور کامران مه‌نتکیش به روانینی خۆی بۆ بزوتنه‌وه‌ی سیاسیی رۆژهه‌ڵاتدا بچێته‌وه، چونکه ئه‌وه‌ی ئه‌و وه‌ک «مه‌هزه‌له» (گاڵتەجاڕ) ناوی ده‌با، ئه‌فسانه‌ی قه‌ڵای دمدمی ئه‌مڕۆمانه.
له کۆتاییدا حه‌ز ده‌‌که‌م ئه‌و کورته وڵامه‌م به چه‌ند دێرێكی عه‌لی عارف ئاغا ته‌واو بکه‌م که هه‌ر ده‌ڵێی بۆ حیزبی دێموکڕات و خه‌باتی رۆژههڵاتی نووسیوه:
ده‌مێکه گیانی ئه‌م [حیزبه] پرووکاوه له ئازارا
بهڵام شێرانه ڕوو نادا به ئازار و به‌بێ زارا
به چالاکی به دڵپاکی خه‌باتی کردووه هه‌رده‌م
له ده‌شت و شاخ و ڕووبارا له دێهاتا له‌ناو شارا
به‌رامبه‌ڕ ئاگر و لافاوی زه‌حمه‌ت نه‌یبووه باکی
به مه‌ردانه‌ش که وه‌ستاوه له‌ڕووی ناپاک و به‌دکارا
—
لینکی بابه‌ته‌که‌ی د. کامه‌ران مه‌نتک
https://www.facebook.com/Kameranmentk/posts/612779174381946