گیاڕەنگ ئاکتێڤی دابزیووە یا وەک عەلی خەندان کووتەنی خوایە وەکەس ناچێت! بیژەن قارەمانی
گیاڕەنگ ئاکتێڤی دابزیووە یا وەک عەلی خەندان کووتەنی خوایە وەکەس ناچێت! بیژەن قارەمانی
چەند ڕۆژیکە هەرەوەزیکی سەیر لە هەموو لایەکەوە کراوەتە سەر سایتی ڕامیاری و کۆمەڵایەتی گیاڕەنگ هەر مەپرسە هەرچی دەنکە جۆیێکی پادشای خواردووە لەم هەرەوەز بەشدارە، سەیر لەوەدایە بابەت و نووسراوە و وتاری کەسیان وە ئەویتریان ناچێت ….
هەر نووسینەی ڕەنگ بۆنی خۆی هەیە وەک گیای سەرە بەهاری وایە هەر بابەتەو تام و چێژی تاێبەتی خۆی هەیە دەڵێی بەهاری دەشتی وەزنێ‌یە لە جوانیدا وێنەی نییە…
سەرەتا وامزانی هاوڕێ و دۆست و مامۆستام کاک حەمەڕەسووڵ کەریمی و شلێر خان لە شاشەی فیسبووک ئاکتێڤیان دابەزیووە پێویستیان بە لایک کۆمینت و نووسین هەیە تا لە ڕێی خوا لەم دۆخە ڕزگاریان بیت ئاکتێڤیان بەرزبیتەوە …!
ئاخر ئەوە چەند ساڵێکە نەزمێک و بەزمێک پیدا بووە کابرا ماویەک دیاری نییە کەس نازانێ لە کوێیە، دەبینی لە پەنا ڕا لێت پەیدا دەبیت ئای میللەت بەمگەنی ئاکتێڤم دابزیووە پێویستم بە لایک و کۆمینت هەیە …..
جا سەیر لەوەدایە خۆ ئەو جۆرە لە هاوڕێیانە بە حەیاتیان دوو دێڕیان نەنووسیوە ئاگایان لە مەحمودی بێ زەواد نییە، ئاکتێڤیان چۆون دابزیووە نازانم !؟
بەڵام بۆ گـــــیاڕەنگ وادەرنەچوو پاش پێداچوونەوە و خوێندنەوەی بەشی هەرە زۆری بابەت و باس و وتارەکان ئەوجار زانیم ئەوە “عید میلادە” واتە پڕ کردنەوەی تەمەنی پڕ لە فەخر و شانازی پەنجەرەیەکی ڕاگەیاندنی کوردی کە نە وەکەس دەچیت نە لە ڕەنگی کەسە ، ئەگەر نەڵێم بە ڕەگەز دەچێتەوە سەر میراتگرانی رۆژنامەگەری کوردی ماڵباتی مێقدات مەدحەد بەدرخانەکان کە ١٢٥ ساڵ پیش بەردی بناغەی رۆژنامەگەری کوردیان دانا هەنووکەش ئەو ڕێگا و ڕێبازە بەردەوامە غەدرم لێکردوون ….
دەڵێن جارێکیان عەلی خەندانی گورانی‌بێژ و هونەرمەند و قسە خۆش و قسە لە روو لە بەر دەرکی دووکانی خۆی « ناوبراو مەعمەلی کڕین و فرۆشی خانوو و زەوی هەبوو » ڕادەوستی دەبینی کابرایەک بەو گوزەرەی دا تێپەڕ دەبیت هەرچی سەیری دەکا و لێی خورد دەبێتەوە وەکەس ناچێت زۆر تایبەتە بە ڕەنگ و رۆخسار ….
لێی‌دەچێتە پیش دەستی دەگرێ دەیباتە ژۆری دووکانەکی کە جەماعەتێکی زۆری لێدەبێ و دەڵێ جەماعەت خوام پێیە وەرن سەیری کەن بزانن هەوە یا نا !؟
هەرچی کابرا تەکا و ڕەجای لێدەکا وازی لێ بێنێ تووشی کوفران نەبیت ….
بۆ مەگەر عەلی خەندان واز دێنء ….
روو لە جەماعەت دەکا دەڵێ ١٤٠٠ ساڵە موسڵمان دەڵێن خوا نە لە ڕەنگی کەسە ، نە وەکەس دەچێ ……
باشە پێم ناڵێن ئەو کابرایە وەکێ دەچێ لە خوای زیاتر !!
شرۆڤە و هەڵسەنگاندن و شەن کەوی گیاڕەنگیش بۆ ئێمەممانان ڕاست وەک نەقڵی عەلی خەندانی‌یە ئاسان نییە ، چۆن ئەو ڕێچکەی گیاڕەنگ لە ماوە و مەودای ٢٠ ساڵی تەمەنی دا گرتبوویە بەر نەک ئاسان نەبوو بگرە زۆریش زەحمەت بوو … ئاخر ناکرێت تۆ سەر بەلایەنێک بیت تا ئاستی پلەی ئەندامی ڕێبەری کادرێکی مەیدانی بەڵام لە نووسین و هەڵوێست دەربڕین لە سنورەکانی ئەخلاقی راگەیاندن نەترازێیت ، جا لۆمەم مەکەن کە دەڵێم وەکەس ناچێت چۆن لە نیزیکەوە سەیری کار و ئەرکە حیزبیەکانیانم کردووە لەهەمانکاتدا ئەرکی ڕاگەیاندنی ئەوان شلێر خان و کاک حەمەڕەسووڵ لێرەش جیاواز دەرکەوتن تەواو کار، تەواو وەخت ژیانیان بۆ کوردایەتی تەرخان کردووە، بێ ئەوەی سنوورەکانی ئەخلاقی سیاسی کۆمەڵایەتی و ڕاگەیاندن تێک بدەن یا بە دژی یەکتر بەکاریان بینن ، ئاخر ئاسان نییە …..
گیاڕەنگ وەک موعيزەی مەلای مەزگەوتی مەنگوڕان و سۆفی خواناسی قەراغ کۆڵەکەی مەزگەوتی بەسەرهاتووە ئەو ٢٠ ساڵەی تەمەنی بەسەر پردی سێڕاتی دا ڕوویشتووە بێ ئەوەی پێی ترازا بێت ….
دەڵێن و دەگێڕنەوە : مەلا لە مزگەوتی موعيزەی دەکرد باسی خواناسی و ترس و خۆفی لە خوای دەکرد لە رۆژی مەعشەرێ‌دا ….. حیساب و کیتاب، ئاوهایە کەسی موسڵمان بەسەر پردی سێڕاتییدا دەپەڕێتەوە : ئەو پردە لە مووی باریکترە لە ئەڵماسی تێژترە ، دنیا بەحرێکی بێ بنە لەسەر پشتی گایە و گا لە سەر پشتی ماسیی …. ولحاسڵ !
کابرای سۆفی بەدم سەبیلە هەڵپێچانەوە دەڵێ: بەخوای مامۆستا ڕاستە خوا لە جێی حەق دانیشتووە ، بەڵام وەڵلاهی ئەو تڕەکەڵەکەی تۆ باسی دەکەیت سەر ناگرێ کەس لەو پردەی ناپەڕیتەوە …..
بەڕاستیش ئەگەر سەیری ڕابردووی کاری حیرفەیی سایتی گیاڕەنگ کەیین بەتایبەت ئەو دوو زاتەی مەلا و موڕشید و موفتی ئەو سایتە بوون و هەن بەڕێزان خاتو شلێر حەسەنپور و کاک حەمەڕەسووڵ کەریمی ئەو ڕاستییەمان زیاتر بۆ روون دەبیتەوە ئەو بیست ساڵەی کارییان بەکام پێوانە و تەرازوی ئینساف و داد و عەدڵ بۆ هەڵسەنگینن …..؟
ئاسان نییە سەر بە ڕێبازیکی فکری تایبەت و لە چوارچێوەی تەشکیلاتی حیزبیکی سیاسی بە ئەزموون و پڕ لە هەوراز و نشێو بیت ، بەڵام لە ئاست کار و ئەرکی ڕاگەیاندن نە سنوورەکان تێکدەی و نە سنوورەکان بەبزێنی ، کارێک کە لە ڕۆژگاری ئەمڕۆدا ئەگەر نەڵێم ئاسان نییە تەنانەت محاڵیشە ..
شتێک کە گیاڕەنگ کردی لە ماوەی تەمەنییدا بە خەڵکی هاوشێوە نەکرا .
گیاڕەنگ لە مەودای تەمەنیدا خۆی لە قەرەی ئەو بابەتانە نەدا و نەچووە ژێرباریان کە باراشی ئاشی دووبەرەکیان دەهاڕی بۆیان گرینگ نەبوو بەرژەوندی نیشتمان و نەتەوە.
گیاڕەنگ لە شاخیکەوە بوو بە هێزیکی پێشمەرگە لە هێزیکی پێشمەرگەوە بوو بە ناوەندیکی ڕاگەیاندن لە وەڵاتیکی دێموکرات و ئازاد ، لە ئێرادەدا هەمان شاخ بوو لە هزر و بیر دا هەمان هێزی پێشمەرگە بوو لە ئەخلاق و نیشتمان پەروەریدا بێ وێنە و هاوتا بوو ، لە ناو هەڤاڵان و دەستە خوشکەکانیدا بە ڕەنگ و روخسارێکی جوانتر دەرکەوت ….
لە ڕاستیدا ماڵپەڕی گیاڕەنگ لە بیست ساڵی تەمەنی خۆیدا، هەم بەرزایی شاخی پێوەدیار بوو ، هەم ورە و ئیرادەی پێشمەرگانەی بە روخساریەوە نەقشی بەستبوو ، هەمیش پەنجەرەیەکی ڕاگەیاندن بوو کە توانی کەس بریندار نەکا و رێگای بە هەموو نووسراوە و نووسەرێک نەدا کە نێویان لا گرینگ بوو نەک نێوەروک …
بە باوەڕی من کە ساڵانیکە لە ڕۆژهەڵاتەوە تا سوئید چاوم بەسەر گیاڕەنگەوە بوو، لەگەڵی ژیاوم لە نیزیکەوە هەر دوو بەڕێزان شلێر و حەمەڕەسووڵم ناسکردوە ئەوان بە ڕەچەڵک بۆ کاری رۆژنامەگەری دەچنەوە سەر ماڵباتی بەدرخانەکان، موستەحیلە لەم عەسرەدا سەرەتای سەدەی بیست و یەک ڕێچکەو و ڕێگایەکت گرتبێتە بەر دڵی هەمووانت ڕاگرتبێ، بێ وەی پرنسیپە حیزبی تەشکیلاتیەکانی کاری خۆشت بردبیتە ژێر پرسیار …
بە باوەڕی من ئەگەر خەڵاتی نوبڵ لە ڕاگەیاندن دا بوونی هەبا ئەوە شایانی گیاڕەنگ بوو خەڵاتیک کە ساڵانیکە خوێنەرانی گیاڕەنگ لە بەرۆکی کارگێران و بەڕێوەبەرانی گیاڕەنگیان داوە ….
بیژەن قارەمانی