با به که‌وچکێک ئاو وه‌مه‌له نه‌که‌وین. برایم جەهانگیری
با حیزبه‌کان و خه‌ڵک له‌به‌رامبه‌ر یه‌ک رانه‌گرین. هه‌ڵبژاردن ته‌واو بوو و هه‌ر وه‌ک پێشبینی دواساته‌کانی ته‌بلیغات و ئاڵوگۆڕه‌کانی حاڵ و هه‌وای هه‌ڵبژاردن، خه‌ڵک به هۆی ئه‌وگؤرانکاریانه و فێڵ و ته‌ڵه‌که‌ی رێژیم و ره‌نگه به‌شێکیشی به هۆی ئه‌وه که لایان وایه به هاتنی رووحانی به ڕواڵه‌ت ریفۆرمیست ده‌توانن به‌شێک له‌و مه‌ینه‌ت وگرانیی و بێکاری و گوشاری هه‌مه لایه‌نه‌ی رێژیم له سه‌ر خۆیان که‌م بکه‌نه‌وه ده‌نگیان داوه به رووحانی و که ئه‌وه‌ش له دیدی منه‌وه ئه‌وه نه خه‌یانه‌ته و نه دژایه‌تی کردنی حیزبه‌کان.
به‌ر له هه‌موو لیکدانه‌وه‌یه‌ک ده‌بێ هه‌موو لایه‌ک باوڕ به‌وه بێنن که ئیتر زه‌مانی ئه‌وه به‌سه‌ر چووه هه‌ر حیزب و هه‌ر رێکخراوی سیاسیی ئه‌ویش له هه‌لوومه‌رجی وا دژوار دا که له ناو خۆ و له ناو خه‌ڵکی خۆیدا نه‌بێ، بریار ده‌ر بێ و خه‌ڵکیش به‌ڵێیان بۆ بڵێن. راستیه‌که‌ی ئه‌وه‌یه که ئێمه وه‌ک خه‌به‌ر و هه‌واڵی ناوخۆی کوردستان ئاگاداری ئه‌و گوشاره بێ ئه‌ژمارانه‌ین که له‌سه‌ر هاونیشتمانانی ناوخۆی کوردستان هه‌یه به‌ڵام هه‌ستی پێ ناکه‌ین، ئه‌وه راستییه‌که و هۆکاره‌که‌شی ده‌گه‌ڕیته‌وه بۆ ئه‌وه‌ی که ئێمه‌مانان له ده‌ره‌وه ده‌ژین و 90 له سه‌دی ئه‌و ناله‌باریانه‌ی ژیانی خه‌ڵکی ژێر ده‌سه‌ڵاتی رێژیمی ئیسلامی هه‌ست پێناکه‌ن و نیمانه. که واته بڕیار دان له شوێنی وا دا هه‌م ئاسانه وهه‌میش ده‌بێ چاوه‌ڕانی بین که جیاوازی بۆچوون و بیر کردنه‌وه هه‌بێ. ئه‌و جار من هه‌رگیز پێم وانیه ته‌نانه‌ت ئه‌وانه‌ی له تاران و له شاره غه‌یره کورده‌کانیش به‌شداری هه‌ڵبژاردنیان کردووه ئه‌وه لایه‌نگری نیزام و ولایه‌تی موتڵه‌قه‌ی فه‌قین؟ بۆ سه‌لماندنی ئه‌و راستیه سه‌یری خۆپێشاندانه‌کانی دوای هه‌ڵبژاردن و ده‌نگ هێنانه‌وه‌ی رووحانی بکه‌ن که لایه‌نگرانی ئه‌و مه‌لایه به سه‌ما و گۆرانی ته‌واو مه منووعه ! خه‌ریکی خۆ نیشاندان وشادی ده‌ربڕینن!
من وه‌ک خۆم له هه‌وه‌ڵه‌وه و له وتووێژ ده‌گه‌ڵ ده‌نگی کوردی ئه‌مریکا و کوردستان و کورد داکوتوومه و ئێستاش له سه‌ر ئه‌و باوه‌ڕه‌م که هه‌ڵبژاردنی سه‌ره‌ک کۆماری له ئێران دا پێوه‌ندی به کورده‌وه نییه و خۆزگه رۆشه‌نبیره کورده‌کان و حیزبه‌کان هه‌وڵی ئه‌وه‌یان دابا که ئه‌و زه‌مینه‌یه‌و ئه‌وهزره له ناو کومه‌ڵگای کوردی دا بڵاو که‌نه‌وه که ئه‌و هه‌ڵبژاردنه نه بۆ کورده و نه له‌هیچ باریکه‌وه پێوه‌ندی به ئێمه‌وه هه‌یه . ئێستا ئه‌و فکره‌یه چه‌ندی زه‌مان ده‌وێ و یان نا ئه‌و مه‌سه‌له‌یه‌کی دیکه‌یه به‌ڵام کاره‌که له جێی خۆیدایه چون کورد به ڕاستی له هه‌ڵبژاردنی سه‌ره‌ک کۆماری له ئێران دا زۆر به ئاشکرا هه‌موو مافه‌کانی پێشێل کراوه و وه‌لانراوه.
که بێینه سه‌ر ته‌حریم دیسان ئه‌وه‌ی که حیزبه‌کان کردیان کاری دروستیان کرد، ته‌حریم کردنی هه‌ڵبژاردنێک که هییچ ئاسه‌وارێکی دیمۆکراتیکی تێدا نییه و به زه‌ڕه‌بین بۆی بگه‌ڕێی تاقه یه‌ک خاڵی هه‌ڵبژاردنێکی ئه‌وڕۆیی و ئازادی تێدا نابینییه‌وه چۆن ده‌کرێ به‌شداری تێدا بکه‌ی؟ ئایا هه‌ر چوونکێ خه‌ڵک ده‌نگیان داوه که‌واته حیزبه‌کان هه‌ڵه‌ن و له مه‌یدان چوونه ده‌ر و خه‌ڵک به قسه‌یان ناکات؟ یان ئه‌و هۆکارانه‌ی له سه‌ره‌وه باسکران له‌و مه‌سه‌له‌یه دا ده‌خیلن؟ ئه‌گه‌ر وابێ خۆ هه‌ڵبژاردنه‌کانی سه‌ره‌تای دامه‌زرانی ئه‌و رێژیمه نه‌کبه‌ته هه‌ر کورد ده‌نگی نه‌دا ده‌نا ئه‌وانی دی به لێشاو ڕوویان کرده سه‌ندووقه‌کانی ده‌نگدان و مۆری سه‌لماندنیان له ” جمهوری اسلامی” نه یه‌ک وشه زیاتر و نه یه‌ک وشه که‌متر دا ئایا چاکیان کرد؟ ئایا له چه‌ند ساڵی رابردوو و له کاتی ده‌سه‌ڵاتی سه‌دام و سووریا دا هه‌ڵبژاردنه‌کان و ده‌نگ دانه‌کان به میلۆن خه‌لکیان نه‌ده‌برده سه‌ر سندووقه‌کانی ده‌نگدان و سه‌دام و به‌شار ئه‌سه به رێژه‌ی زیاتر له 95 له سه‌دی ده‌نگه‌کان نه‌ده‌بوون به سه‌ره‌ک کۆمار؟
له‌گه‌ڵ هه‌مووی ئه‌وانه دا با پشوومان له‌سه‌ره خۆ بێ، جارێ هێشتا رووحانی هیچی نه‌کوتووه و بۆ منی هۆگری کار و باری سیاسیی ئه‌وه‌نده کافی نییه” من به عهدی که با مردم بسته‌ام پایبندم”! خاته‌میش به ده‌یان میلۆن ده‌نگی زۆر شێلگیری له پشت بوو که چی دیتمان پیاوی مه‌یدانی سیاسه‌ت نه‌بوو. زۆر به هاسانی ته‌سلیمی گوشاری سپا و وه‌زاڕه‌تی ئیتلاعات بوو و پشتی له خه‌ڵک و له خواسته‌کانی خه‌ڵک کرد. با په‌له نه‌که‌ین و با به که‌وچکێک ئاو وه‌مه‌له نه‌که‌وین. هیوادارم بۆچوونی مه‌مانان به درۆ ده‌ربچێ و رووحانی بتوانێ گورانکاری پێویست له‌و ساختاره ئه‌منیه‌تی و پۆلیسییه دا بکات که ته‌نیا ئه‌وه‌یه رێگای ئاڵوگوڕی جیددی و ئه‌ساسی له‌و نیزامه دا خۆش ده‌کات. ئه‌گه‌رچی به بڕاوی من رووحانی ته‌نیا پیاوی سیاسه‌تی ده‌ره‌وه‌یه و له سسیاسه‌تی ناوخۆ دا چی وا له‌وانی پێش خۆی چاکتر نابێ، ئه‌و به ستراتیژی رزگاری حکوومه‌ت له‌و قه‌یرانه‌ی تێی که‌وتووه و که زیاتریش له‌سه‌ر مه‌سه‌له‌ی چه‌کی ئه‌تۆمیه سینگی داوه‌ته پێش نه‌ک چاکسازی له داڕشتی ئه‌و سیسته‌م و ده‌سه‌ڵاته‌دا.