ئه‌مه‌گناسیتان بۆ شه‌هید دوکتور قاسملوو هیوابه‌خشه!
ئه‌م ساڵ که سی ساڵه‌ی تێرۆری رێبه‌ری لێوه‌شاوه‌ی حیزبی دێموکڕات و گه‌لی کورد دوکتور عه‌بدولڕه‌حمان قاسملوو و هاوڕێیانی بوو، ئه‌ندامان و لایه‌نگرانی حیزبی دێـموکڕاتی کوردستان له چوارچێوه‌ی ئه‌و به‌رنامه‌ڕێژییانه‌دا که ده‌فته‌ری سیاسیی حیزب و کۆمیته‌ی یادکردنه‌وه‌ی ٣٠ ساڵه‌ی دوکتور قاسملوو دایڕشتبوو، له چه‌ندین چالاکیی دیار و دره‌شاوه له کوردستان و له ده‌ره‌وه‌ی وڵات هه‌م یادی ڕێبه‌ری شه‌هیدیان به‌رز راگرت، هه‌م جینایه‌تی کۆماری ئیسلامی و مامه‌ڵه‌ی سه‌وداچییانه‌ی ده‌وڵه‌تی ئوتریش له‌گه‌ڵ ئه‌م کاره‌ساته‌یان ڕیسوا کرد.
تێکۆشان و ماندووبوونی ئۆرگانه پێوه‌ندیداره‌کانی حیزب بۆ ئاماده‌کردن و به‌ڕێوه‌بردنی ئه‌م چالاکییانه و پێشوازیی به‌رچاوی ته‌شکیلاتی حیزب له نێوخۆ و له ده‌ره‌وه‌ی وڵات و هه‌روه‌ها پێشوازی و به‌شداریی به‌رچاوی دۆستانی حیزب و هۆگرانی مه‌سه‌له‌ی کورد، نیشانده‌ری ئه‌مه‌گناسیی ئه‌وان بۆ شه‌هید دوکتور قاسملوو و زیندوویی هه‌رده‌م زیاتری یاد و وانه‌کانی ئه‌و گه‌وره نه‌مره له زه‌ین و دڵ و ده‌روونی تێکۆشه‌رانی دێموکڕات و خه‌ڵکی کوردستاندایه.
به‌م بۆنه‌وه ده‌فته‌ری سیاسیی حیزبی دێموکڕاتی کوردستان به پێویستی ده‌زانێ به گه‌رمی سوپاس و پێزانینی خۆی له به‌رامبه‌ر هه‌موو ئه‌و که‌سانه و به‌گشتی خه‌ڵکی کوردستان د‌ه‌رببڕێ که له‌‌م یاده‌دا به‌پیل به‌رنامه و بانگه‌وازه‌کانی حیزبی دێموکڕاتی کوردستانه‌وه چوون و به‌م شێوه‌یه هیوا و دڵگه‌رمیی زیاتریان به رێبوارانی رێگای شه‌هید دوکتور قاسملوو به‌خشیوه.
حیزبی دێموکڕاتی کوردستان
ده‌فته‌ری سیاسی
٢٤ی پووشپه‌ڕی ١٣٩٨ (١٥ی ژووئیه‌ی ٢٠١٩)