ئاوڕدانەوەیكی بە جێ لەڕابردووی فەرماندە و پاڕتیزان و كەسایەتی خۆشناو، كاك مەلا حەسەن شیوەسەڵی
ئەحمەد مەکڵاوەیی
ئێسیتا نەوجەوانێك بوو، سەرەتای ساڵی 1358 بوو، لە گەڵ مام عەبدووڵام بۆ كارێكی حیزبی چووینە شاری مهاباد و ، روومان لە كومیتەی حیزبی دێموكراتی كوردستان كرد
بۆ یەكەمجار لەوێ چاوم بە دوكتور قاسملووی نەمرو كاك مەلا حەسەن شیوەسەڵی و مەلا محەممەدی جوانڕۆ و كاك مەلاسەدیق كەوت
هەر كە چاوم پێیان كەوت ، دڵم پێیان گەشایەوە، جوان هاتنە بەڕ چاوم ، هەر چواریان قسە خۆش و شێرین هاتنە بەر دڵم
دووهەمجار كە كاك مەلاحەسەنم دیتەوە، هاوینی ساڵی 1359 لە نێو گوندی مەكاوێ بوو، جەنگەی شەڕی دارساوێن بوو، لە چوالەی ساباتێوە بەرەو ماڵی برایمی قادراغای دەچوو
ئیتر لەوكات بەدواوە كاك مەلا حەسەنم نەدیتەوە، بەڵام هەمیشە ناو و ناوبانگ و ئازایەتی ئەوم دەبیست و، قیافە جوانەكەی لە بەر چاوم ون نەدەبوو و ، وتەكانی لە یەكەم چاوپێكەتنم دا ، هەروەك ئەوكات لە مێشكم دا دەزرینگانەوە
كاك مەلا حەسەن هەم فەرماندە بوو هەم باشترین پارتیزان، لەنێو خەڵك و پێشمەرگەدا زۆر خۆشەویست بوو، زۆر زەبری بەژانی لە دوژمن وەشاندن كە ئێستاشی لە گەڵدابێ پێیانەوە دەناڵێنێ ، دوژمن حیسابی تایبەتی لە سەر دەكرد، هەمیشە لە حەولی لە ناوبردنی دا بوو ، بەڵام زۆر جاران پیلانەكانی دوژمنی تێك دەدان ، بەڵام بە داخەوە جارێك لە پیلانەكەی دا سەركەوت و لە رێگەی كتێبێكی بۆمبڕێژكرا و، بە دەستكیس و هۆی خیانەتكاران، توانی ئەو كەڵە پیاوە كەم ئەندام بكات
ئەمرۆ لە 16/9/1403 ، لە رۆژی كەم ئەنداماندا ، لە سەر تۆڕی دونیایی مەجازی كە چاوم بە وێنەی كەم ئەندام بوونی ئەو چەگوارەی كوردستان كەوت، مچووركی خەم هەژاندمی و، وێنەو روخسارە جوانەكانی رابردووی هاتنەوە بەرچاوم و ، یەك بە یەك دارو بەردی ناوچەی سەردەشت هاتنە بەر دەمم و، هەریەك بە جۆرێ لێم كەوتنە پرسیار و ، بە سەدان دێڕ و وشەی جوان جوان، هەواڵی یاری خۆیان پرسی
لەم كاتە ناخۆشە دا، قەڵەمی دەستم لە جوانی رستەو وشەی ئەوان، خۆی راپسكاوت و، لەسەر پەڕەی سافی دڵم، كەوتە گەڕو، بێ روخسەت لە نووسەر ، بۆی نووسی، وشەو دێڕی زێڕین، كە هەموو وەك ئەستێرە نەقش بوون لە نێو ئاسمانی ساماڵی وڵاتم
لە جوانی نەقشی وشەو دێڕان، ئەستێرەی سەر كەلان دایان لە سۆلە و، وەك باڵدار بەرەو لانك و گیارەنگ، فڕین، تا لەوێ ، تاوێك لە جەوی سەر شاخ و داربەڕوەكان دا ، گوێ بۆ پێكەنیین و قاقای چەكوارەكەی كوردستان بگرن
ئەمڕۆ، لە رۆژی كەم ئەندامان دا ، كێوی هۆمل كە لە بزەو روخسار رابردووی یاری كۆنی ڕاما ، دیتی ئاوی روون و بە خوڕی سەچاوەی میرگاسێ ، لە تاوی لە دەستچوونی چاوەكانی سەركردەكەی، لە خوڕە خوڕ وەستاوە و ، خەریكە بڕیاری حەرام بوونی خواردنەوەی خۆی بۆ دوژمن دەنووسێ
هۆ سەركردە ،هۆ فەرماندە نەترسەكەی دێموكرات، ئەمڕۆ هەموو لاوانی مەڵبەندەكانی باژاڕو زەدكەو سوێسنایەتی و ئیدی، لە یادی كارەساتە ناخۆشەكەی نێو بنكەی حەسانەوت لە كۆن سونێ، بۆت نارەحەتن و بەم بۆنە تاڵەوە ، لە دەفتەری بیرەوەریان دا ، دێر و وشەو پەخشانی وەفاداریت بۆ دەنووسن
هائێستاكە ، ئەوە مەلەكانی نەلێن و سەری گۆمێ و دەم چۆمی كەڵوێ و هەموو ناوچەی باسك ، لە جێ راوگەی راوی تۆ لە دوژمن ، لە سێ ڕێیان و دەم چۆمی كۆبوونەوەو، بە یادی تۆوە ، بە هەزار جۆر، بە سروود و گۆرانی، گوڕە شێرانەت، بە سەڕ دەسەڵاتی زۆرداریدا دەخوێنەوە
دوژمن ویستی بت كووژێ، بەڵام ئیرادەت زۆر بەرز بوو، پێت نەوێرا، روونی چاواكانتی ئەساند، بەڵام بە مێشك و قەڵەم و وتەكانت نەوێرا، ئێستاش دەبینم پیلانەكانی دوژمن لە قاو دەدەی، كوڕ و كچەكوردان فێری خۆڕاگری دەكەی، بیر و زەینت، هەوری بارانی رەحمەتن، نم نم بەسەر لاوانی گوند و شاردا، دەبارێن وفێری نیشتمانپەروەریان دەكەیت و، دێنە نێو ریزی شۆڕشگێڕان و ، رێبازەكەت درێژە دەدەن
ئەحمەد مەكڵاوەیی16/9/1403