نه‌ورۆزی ٢٧١٢ له رۆژهه‌لاتی کوردستان . سه‌ید ئه‌حمه‌د حوسێنی
نه‌ورۆزی ٢٧١٢ له رۆژهه‌لاتی کوردستان . سه‌ید ئه‌حمه‌د حوسێنی
نه‌ورۆزی سالی رابردوو له رێوره‌سمێکی بێ‌وێنه‌دا. خه‌لکی ره‌به‌ت ئاگری نه‌ورۆزیان کرده‌وه و ده‌سپێکی ساڵی تازه‌یان کرده ئاهه‌نگێکی پڕشکۆ. ئه‌وساڵیش ئه‌و رێوره‌سمانه به‌شێکی به‌رچاوی گوند و شاروچکه‌کانی گرته‌وه، که دیسان ره‌به‌ت سه‌رتۆپی هه‌موویان ده‌هاته به‌رچاو.
پیرۆز کردنی نه‌ورۆز بۆ کورد شتیکی تازه نیه، به‌ڵام پێکهێنانی رێوره‌سمی نه‌ورۆز به‌م شێوه و به‌م ناوه‌رۆکه له ناو دڵی ده‌سه‌ڵاتی تاریک په‌ره‌ستی ئێراندا، نه‌ک هه‌رشتێکی بێ‌وێنه به‌ڵکوو سه‌ره‌تایه‌ک بوو بۆ گۆرانکاری به‌رچاوی کۆمه‌ڵگای کوردی. بۆیه دێنێ به چاوی ورد بینیه‌وه بخرێته به‌ر سرنج و لێکۆڵینه‌وه و له سۆنگه‌ی ئه‌م واقع‌شدا، هه‌ڵسوکه‌وت و خوێندنه‌وه‌ی گونجاوی له گه‌ڵ بکرێت.
بۆ من وه‌ک کوردێکی دوره‌وڵات، رێوره‌سمه‌کانی نه‌ورۆزی ئه‌مساڵ، ته‌نیا رێوره‌سمی ئاسایی پیرۆزکردنی نه‌ورۆز نه‌بوون. به‌ڵکوو هه‌ڵگری ده‌یان هێما و په‌یام و هاوکات راگه‌یه‌نه‌ری پێگه‌یشتنی نه‌سڵێکی تازه‌ی کورده‌واری بوون که به ئاگاهیه‌وه چیتر شه‌رمێون نیه و گوتاری خۆی ناشارێته‌وه و بوونی خۆی وه‌ک یه‌که‌یه‌کی جیا له‌ویتر، به‌رجه‌سته ده‌کاته‌وه.
ئه‌و رێوره‌سمانه په‌یامی شه‌فافی خه‌ڵک بوون که له‌گه‌لڵ گوتار و مه‌یلی به پاشکۆکردنی کورد ( له له‌یه‌ن کوردو بێگانه‌وه) سنووربه‌ندی روونی هه‌یه و چوارچێوه بۆ ئه‌و خه‌باته مه‌ده‌نیه دیاری ده‌کات که ئێستا له لایه‌ن زۆر کۆروکۆمه‌ڵ، هه‌ر یه‌ک به مه‌به‌ستێک کراوه‌ته به‌رنامه‌ی کار.
خه‌ڵکی ڕه‌به‌ت و گۆلێ و دیواڵان و …… به ئاشکرا نیشانیان دا، ئه‌وان به پاراستنی هوویه‌تی نه‌ته‌وه‌یی خۆیان، سوورن له سه‌ر نرخاندن و رێزگرتن له به‌ها و هێما نه‌ته‌وه‌ییه‌کان و هاوکات مه‌شخه‌ڵی ده‌سپێکی خه‌باتی نافه‌رمانی مه‌ده‌نیان دژی یاسا و بریاره نائه‌خلاقی و نامرۆڤانه‌کانی ده‌سه‌ڵاتی تاران، هه‌ڵکرد تا به ویسته‌کانیان بگه‌ن.
ئه‌وان به کرده‌وه و ئاگاهانه ئه‌م شێوه خه‌باته‌یان دژی نورمه‌کانی یاسامه‌ندکراو ده‌کار هێنا و به شه‌هامه‌ته‌وه بارودووخی نایه‌کسانی و پڕ له سه‌رکوتیان شه‌رمه‌زار کرد و رزگاریان کرده په‌یامی تۆخی خۆیان.
نه‌ورۆزی ئه‌مساڵ سیمبۆلی گورانێکی به‌رچاوی کۆمه‌ڵگای کوردی بوو،که جێ‌پێی راپه‌رین خۆش ده‌کات. هوشیاری نه‌ته‌وه‌یی و هوشیاری کۆمه‌ڵایه‌تی و به جه‌ماوه‌ری بوون له تایبه‌تمه‌ندیه به‌رچاوه‌کانی ئه‌م رێوره‌سمانه بوون. ئه‌و تایبه‌تمه‌ندیانه بوونه هۆی ئه‌وه، ئیراده‌ی پته‌و، ویستی نه‌ته‌وه‌یی، هاتنه‌مه‌یدانی بوێرانه و بروا به ئازادی ژیان، سه‌رچاوه و پاڵنه‌ری ئه‌م نه‌سڵه بوێره بێت تا یه‌کگرتوانه به‌هاکانی نه‌ته‌وه‌یی و نۆرمه‌کانی کۆمه‌ڵایه‌تی وپرسه‌کانی کولتوریی خۆی وه‌ک که‌مایه‌تی له ئێراندا زیندوو رابگرێت و به هێزی بکات و دواجا زۆرێنه‌ی حاکم ناچار به دان‌پێنانی ئه‌وان بکات.
هه‌وێن و ئولگوی ئه‌م رێوره‌سمانه، له رێوره‌سمه سیاسیه‌کان وه‌رگیرابوون و ناوه‌رۆکی سه‌رجه‌م وتار و شێعر و گورانی و سروده‌کان، به ئاشکرا گه‌رانه‌وه بوو بۆ ئامانج و گوتار و شێوازی خه‌باتی جه‌ماوه‌رپه‌سه‌نی ده‌یه‌ی ٦٠ی هه‌تاوی و هاوکات په‌یامیک بوو بۆ جوله و ڕابوون و ئاماده‌یی ده‌ربرین بۆ زیندووکردنه‌وه‌ی سه‌روه‌ری و شانازیه‌کانی سه‌رده‌می به‌رگریی شاخ.
بێگومان به‌رجه‌سته کردنه‌وه‌ی هێماکانی نه‌ته‌وه‌یی و خه‌باتی به‌رگریی پێشمه‌رگانه، له وتار و کرداردا، شتێکی به هه‌ڵکه‌وت و بێ بیرلێکردنه‌وه نه‌بوون. پۆشاکی پێشمه‌رگانه، سروودی شورشگێرانه‌ی زه‌مه‌نی پێشمه‌رگایه‌تی، ره‌شبه‌ڵه‌کی کیژوکور، ده‌کارهێنانی ره‌نگی گه‌شی جیاواز، ده‌نگی گورانی چڕینی ژن، توڕهه‌ڵدانی حیجابی زۆره‌ملی و دواجار هاواری ئازادیی و به‌ڵێنی سه‌رکه‌وتن و لاواندنه‌وه‌ی دایکی نیشتمان، به ئاشکرا ره‌تکردنه‌وه‌ی یاسا و بریاراتی سه‌پێندراوی رژیمی کۆماری ئیسلامی و واقعی ئیستای کوردستان بوون.
سه‌ره‌رای ئه‌وانه‌ش، له ده‌لاقه‌ی تێروانینێکی کۆمه‌ڵناسانه‌وه، ئه‌م رێوره‌سمانه هێمای ده‌سپێکی پرۆسه‌یه‌کی گرینگی کۆمه‌ڵایه‌تی بوون که ده‌خوازێت به‌م شیوه جه‌سته‌ی زامدار و شه‌که‌تی سه‌رمایه‌ی کۆمه‌ڵایه‌تی، کۆمه‌ڵگای کوردی سارێژ کاته‌وه و کارتێکه‌ری و شوێنه‌واری نه‌رێنی فاکتۆره‌کانی ده‌ره‌کی و ناوخۆیی بۆ له یه‌کترازان و نه‌بوونی متمانه، له سه‌ر په‌یکه‌ری کۆمه‌ڵگا بسرێته‌وه.
ئه‌و رێوره‌سمانه ده‌توانن سه‌ره‌تایه‌ک بن بۆ لێک نزیک کردنه‌وه‌ی کۆمه‌ڵانی له‌یه‌کدابراوی خه‌ڵک له ده‌وری یه‌ک تا جارێکیتر وه‌ک ساڵانی ٥٧ـ ٥٦ ی هه‌تاوی روحێکی کۆیی یه‌کگرتوو له ناو کۆمه‌ڵگادا پێک بێنێته‌وه و قۆناخی ته‌فره‌قه و دابران و ئاڵۆزی فیکری و جیاوازی گوتار، تێپه‌ر کات.
ئه‌م حه‌ره‌که‌تانه ده‌توانن سه‌ره‌تایه‌ک بن بۆ خه‌باتێکی گشتگیری نافرمانی مه‌ده‌نی که بێگومان چاوه‌روان ده‌کرێت، ئه‌م ستراتژیه گرینگه بکاته ئامانج، که مه‌شروعیه‌ت و هێزی ئینسانی به ته‌واوی له هه‌یکه‌لی ده‌سه‌ڵات داماڵێ و سه‌رئه‌نجام بۆ به چۆک داهێنانی دیکتاتۆر و گه‌یشتن به رزگاری ؛
- بروا به‌خۆ بوون و ته‌کنیک و لێزانی به‌رگریی له ناو خه‌ڵکدا به هێز بکات
- خۆیان یه‌کگرتوو بکه‌ن و به هه‌موو جیاوازیه‌کانه‌وه بۆ یه‌ک ئامانج تێبکۆشن
- نه‌هێڵن سیگناڵ و گوتاره‌کانیتر کار له ئیراده‌یان بکات و تووشی لێکترازان بن
- به پێکهێنانی رێوره‌سمی له‌م چه‌شنه، بانگه‌واز بکه‌ن له روح و گیانی هیوادار و خاوه‌ن هه‌ست و نیشتمانپه‌روه‌ری نه‌ته‌وه‌که‌مان تا وڵامی ده‌نگی ویژدان و هاواری ئازادیی ده‌روون بده‌نه‌وه و بۆ رزگاری نه‌ته‌وه‌یی به کۆ تێبکۆشن
بێگومان به‌رێوه‌به‌ران و به‌شدارانی ئه‌م رێوره‌سمانه که‌سانی خاوه‌ن هه‌ڵوێستی نه‌سڵی تازه‌ن، که خه‌ونه‌کانیان، چیرۆکی شه‌وانه‌ی منداڵیان، داستانه‌کانی قاره‌مانه‌تی ساڵه‌کانی ٦٠ی هه‌تاوی خه‌باتی نه‌ته‌وه‌که‌مانن و به وه‌رگرتنی ئه‌زموون، سوورن له سه‌ر رێبازی شه‌هیدان . داواکانیان شه‌فاف، هه‌نگاوه‌کانیان قایم، رێبازیکیان گرتۆته پێش که داهاتوویه‌کی رووناکی هه‌یه. ئه‌وان گه‌وهه‌ر و ئه‌ڵماسی به نرخی نه‌ته‌وه‌که‌مانن.
من که له دووره‌وه ده‌روانمه خه‌ڵکی زێد و نیشتمانه‌که‌م ته‌نیا بۆ کۆتایی ئه‌م نوسراوه ده‌توانم چه‌ند دێر له وتاری * چارلز ستیوارت پارنێل* که له کۆبوونه‌وه‌ی مانگرتوانی ئیرله‌ندا، زیاتر له سه‌د ساڵ پێش ئێستا وتوویه‌تی پێشکه‌ش به به‌رێوه‌به‌ران و به‌شدارانی رێوره‌سمه‌کانی نه‌ورۆزی ٢٧١٢ی کوردی، له رۆژهه‌ڵاتی کوردستان بکه‌م:
پشت به ده‌وڵه‌ت مه‌به‌ستن! پێویسته ته‌نیا پشت به ئیراده‌ی خۆتان ببستن. به یه‌کگرتوویتان یارمه‌تی یه‌کتر بده‌ن. ئه‌وانه‌ی لاوازن به هێزیان که‌ن. له ناوخۆتاندا پێوه‌ندی پته‌و پێک بێنن. خۆتان رێکخه‌ن و دڵنیام سه‌رده‌که‌ون.
سه‌ید ئه‌حمه‌د حوسێنی