نامیلکەی (قاسملوو: ئە‌ستێره‌یه‌كی پڕشنگدار و بێ ئاوا بوون) بەشێک لەوتار و بابەتەکانی هاوڕێی تێکۆشەر د. قادر وریا
نامیلکەی (قاسملوو: ئە‌ستێره‌یه‌كی پڕشنگدار و بێ ئاوا بوون) بەشێک لەوتار و بابەتەکانی هاوڕێی تێکۆشەر د. قادر وریا سەبارەت بە کەسایەتی شەهید “دوکتور قاسملوو”. بە بۆنەی ٣٥مین ساڵوەگەڕی تێرۆری ناجوامێرانەی ڕێبەری کاریزماتیک و لێهاتووی نەتەوەی کورد، دوكتور قاسملووی نەمر، بە دەستی ڕەشی ڕێژیمی کۆماری ئیسلامیی ئێران.
سپاس و پێزانین بۆ ئەو پێشەکییە جوان و بەنرخە هەروا قەڵەم ڕەنگین و سەڵامەت و تەمەن درێژ بن بۆ گەل و نیشتمان.
کۆی نامیلکەکە ٢٦ وتارو بابەت و ١٠٠ لاپەڕەیە.
کۆکردنەوە و ئامادەکردنی: ڕەحمان نەقشی
پێشەکییەک بۆ ئەم نامیلکەیە
قادر وریا
ئەگەر بمهەوێ لە ڕستەیەکدا کاک رەحمان نەقشی پێناسە بکەم، دەڵێم “ئەو پیاوەی زۆربەی تێکۆشەرانی دەست بە قەڵەمی ئەمڕۆی ڕۆژهەڵاتی کوردستان پێی قەرزدارین!”، بەڵگەشم بۆ ئەم جۆرە پێناسەکردنی ئەوەیە ناوبراو بێ ئەوەی داوامان لیکردبێ، بێ ئەوەی خێرێکمان بە خۆی گەیاندبێ، هەروەها بێ ئەوەی حیزبێک، ڕێکخراوێک، دامەزراوەیەک، ئەرکێکی لەم پێوەندییەدا پێسپاردبێ و لە بەرامبەر ئەم زەحمەت و ماندووبوونانەیدا کەمترین پاداشی پێبدات، کردوویە بە ئەرکی سەرشانی خۆی کە نووسین، لێدوان و هەڤپەیڤینی سیاسییەکان، یان نووسەران و چالاکانی دیاری نێو تۆڕە کۆمەڵایەتییەکان لای خۆی ئەرشیڤ بکات، ناو بە ناو نامیلکەیەکیان لێ ئامادە بکا و بیانخاتە بەردەستی خوێنەران. هەر بۆ خۆم هێندێک جار نەمزانیوە نووسین یان بابەتێکی پێشووی خۆم لە کوێ و چۆن بدۆزمەوە، بە ناچار پەنام بۆ کاک ڕەحمان بردووە و داوای ئەو نووسینەی خۆم لێکردووە؛ لەگەڵ ئەوەی وا هەبووە ئەم نووسینەم زیاتر لە ١٠ ساڵ بەسەر بڵاوبوونەوەیدا تێپەڕیوە، بەزوویی بۆی دۆزیومەوە و فایلەکەی بۆ ناردووم. هێدنێک کەسی دیکەش دەناسم کە بۆ دیتنەوەی نووسینێکی خۆیان هەمان ڕێگایان گرتووەتەبەر.
ئەوا ئەمساڵیش بە نزیکبوونەوە لە یادی ٣٥ ساڵەی تێرۆری ڕێبەری لێهاتوو، د.قاسملوو، جارێکی دیکە، کاک ڕەحمان نەقشی، قەرزداری خۆی کردوومەتەوە و کۆمەڵێک لە نووسین و بابەتەکانی ئەم ساڵانەی دوایی منی لە توێی نامیلکەیەکدا بۆ بڵاوکردنەوە ئامادە کردووە. خۆزگەم دەخواست من و هەموو ئەوانەی شایەدی ماندووبوون و دڵسۆزییەکانی کاک ڕەحمان لە ئاست ئەرشیڤکردن و بڵاوکردنەوەی نووسینەکانی خۆمانین، بمانتوانیبا لانی کەم گۆشەیەک لەو خزمەتانەی قەرەبوو بکەینەوە. ئەم هەمووە کات و وزەیەی ئەم برا بەڕێزەمان لە ماوەی چەندین ساڵی ڕابردوودا بە شێوەی خۆبەخشانە بۆ کۆکردنەوە و ئەرشیڤکردن و سەرلەنوێ بڵاوکردنەوەی بەرهەمی سیاسینووسەکانی ڕۆژهەڵات لە میدیای ئەلێکترۆنیدا تەرخانی کردووە، یەک سەرچاوەی هەیە، ئەویش هەستکردن بە بەرپرسایەتی لە ئاست خەباتی ئازادیخوازیی نەتەوەکەی و ڕێزدانانی بۆ کاری سیاسی و فکریی ڕێبەران و تێکۆشەرانی بزووتنەوەی نەتەوەیی و ڕزگاریخوازیی کورد لە ڕۆژهەڵاتی کوردستانە. کاک ڕەحمان نەقشی ڕێز و خۆشەویستییەکی تایبەتی بۆ د.قاسملوو وەک شوێندانەرترین و دیارترین سەرکردە و کەسایەتیی نێو ئەو بزووتنەوەیە هەیە، بۆیە لە ماوەی ٢٠ – ٣٠ ساڵی ڕابردوودا، جگە لەو نامیلکانەی لە وتار و نووسینی جۆراوجۆرهەر ساڵەی بۆ یادی دکتۆر قاسملوو ئامادەی کردوون، کتێبێکی پڕ نێوەرۆک و دەوڵەمەندی پیکهاتوو لە نووسین و بابەتی نووسەران و سیما دیارەکانی بواری سیاسی و ڕۆشنبیری لە کوردستان لە ژێرناوی “قاسملوو لە ئاوێنەی بیرو بۆچوونی دا” لە دوو بەرگدا چاپ کرد، لەم ڕێگایەشدا سەرەڕای ماندووبوونە فکری و جەستەییەکانی، بە گیرفانی بەتاڵەوە تووشی خەرج و تیچوویەکی باشیش بوو.
بە بۆنەی ئامادەکردن و بڵاوکردنەوەی ئەم نامیلکەیەی لەبەردەستتانە، لە قووڵایی دڵمەوە دەستخۆش و ماندوونەبوونی بە کاک ڕەحمان نەقشی دەڵێم. سڵامەتی، تەمەندرێژی و لەگەڵ ئەمانەشدا هەلومەرجێکی باشتر بۆ ژیان و تێکۆشانی بۆ دەخوازم بۆ ئەوەی بە خەیاڵیکی ئاسوودەتر، درێژە بەم خزمەتە خۆبەخشانەیەی بدا.
١٣ی جوولای ٢٠٢٤