بیست چەپکە گوڵ بۆ بیست ساڵەی سایتی گیارەنگ ! م. زێرە
بیست چەپکە گوڵ بۆ بیست ساڵەی سایتی گیارەنگ ! م. زێرە
لەلای ئێمە شەبەقی رووناکی هەتاو لە ڕۆژهەڵاتی تەرەغە ( بۆکان ) خۆ وەدەر دەخا و لە ڕۆژاوای تەرەغە (سەردەشت) ماڵ ئاوایی دەکات و تاریکای باڵ بە سەر وڵات دا دەکێشێ . ئێوارەیە و ماندوو شەکەت لەسەرکارراگەڕاومەتەوە ، کە چاوانم لەسەریەک دانا و بەقوڵایی بیر وناخی دەروونمدا چومەخوار، ئاوری دڵ بەرەو بۆکان سواری ئەسپی خەیاڵی کردم .
لە ئاڵیکەندی شەهیدانەوە دەڕوانمە چیای تەرەغەی و لەوێوە بەرەو هەتاو چاو هەڵنایە ، بەدستی چەپم سێبەرم بۆ چاوم دروست کردووە ، لە زۆر دوور دەڕوانم ، ئاڵای پیرۆز دەکەمە کراسی تەییری ئاشق و شەیدای نیشتمانی جوانم و تەییر بەرەو سەردەشتی سەرسەوز و سوێسنایەتی و دەشتی داوداوێ و مامکاوێی لە شەققەی شاباڵی دەدا و لە داوێنی هەیبەتی لانک لەنگەر دەگرم ، دەچمەوە نێو مەتەرێزی مەلا ئاوارەی دێمۆکراتم و پاڵ وە شاخ ( چیا) ی لانک دەدەم و روو بە چیایی سەربەرزی گیارەنگ شێعری توتنەوانی مەلا ئەحمەدی شەڵماشی ( مەلا ئاوارە) م دەخوێنمەوە :
کوردم و کوردستانم دەوێ!
هەدا نادەم ڕۆژ و شەوێ
خۆم بسرەوم دڵ ناسرەوێ
تاکوو هەلم دەس دەکەوێ
دنیا گشتی سەر یەک کەوێ
لێم ببڕن خۆراک و خەوێ
کوردم و کوردستانم دەوێ
هیوای بەرزم قەت نانەوێ
تاکوو قۆناخی سەربەستی
ئەسپی خەباتم ناوەستێ
تا دەرنەچم لە ژێر دەستی
نامەوێ سەرمایەی هەستی
مەرگ، نەک ژینی ژێر دەستی
کوردم و کوردستانم دەوێ
هیوای بەرزم قەت نانەوێ
بۆ ئازادی و خودموختاری
بۆ سەربەخۆیی و ڕزگاری
بە سەربەرزی و بەختیاری
بە گیان دەکەم فیداکاری
تا دەبڕم کلکی زۆرداری
کوردم و کوردستانم دەوێ
هیوای بەرزم قەت نانەوێ
کلکی زۆردار دەقرتێنم
قەڵای سەختی دەڕووخێنم
بەردی بناخەی دەردێنم
وەک دێڵەسەگ دەیتۆپێنم
کە نەشتۆپا دەیڕەتێنم
کوردم و کوردستانم دەوێ
هیوای بەرزم قەت نانەوێ
دەیڕەتێنم تا کێوی قاف
جیهانی پێ دەکەم تەواف
بەبێ گاڵتە و لاف و گەزاف
شەرتە نەکەم وەعدە خیلاف
یا بمرم یا بستێنم ماف
کوردم و کوردستانم دەوێ
هیوای بەرزم قەت نانەوێ
دەستێنمەوە مافی خوراو
بۆ نیشتمانی بەش کراو
هەزاران دایکی زگ سووتاو
هەزاران لاوی سەربڕاو
دەژیەنمەوە وەک گوڵ بە ئاو
کوردم و کوردستانم دەوێ
هیوای بەرزم قەت نانەوێ
من ناهێڵم نەسلی بەدکار
وەک هەڵۆ لێی دەکەومە کار
بچتە ئاسمان نایکەم قوتار
لە ژێر زەوی بۆی دەچمە خوار
لێی ناهێڵم یەک جووقەوار
کوردم و کوردستانم دەوێ
هیوای بەرزم قەت نانەوێ
جووقەواری لێ ناهێڵم
وڵاتی پێ بەجێ دێڵم
خاکی خۆم بۆ خۆم دەکێڵم
سوودی بزن و مەڕ و چێڵم
چیدی نایدەم بە فڕ و فێڵم
کوردم و کوردستانم دەوێ
هیوای بەرزم قەت نانەوێ
تا کەی خەزێنە و نەوتەکەم
بە بووکۆڵە و فیتفیتە دەم؟
خەڵک شاد و من دڵ بە خەم
لە سەر گەنجی وڵاتەکەم
خاکی خۆشم ئاوارەکەم
کوردم و کوردستانم دەوێ
هیوای بەرزم قەت نانەوێ
پاشان هێز دەدەمە بەرخۆم و هەڵدەستمە سەرپێ و گوڵە مێلاق و بەیبون و هەڵاڵە و نێرگس و شێست پەڕان دەچنم و بیست چەپکەگوڵان دروست دەکەم، دەیدەم بە دەستی خوشکم شلێری دەستەخوشکی سوهەیلا و نەسرینەکانی دێمۆکراتم وناهێڵم تەپە و هەناسەی دڵ لە لێدان بکەوێ و بێ دوو دڵی و دڵەڕاوکێ دادێمەوە کۆنەبرینی یادگاری مەتەرێزی کوردایەتی حەمەرەسووڵەکەم ماچ دەکەم، و پێیان دەڵێم لە تەرەغەی موکریانەوە بە هەگبە و کۆڵەپشتی پێشمەرگانەوە بۆلاتان هاتووم ، ئەمجارەیان هەگبەم هەڵگری کتێب و گەچ و قەڵەمی منداڵانی لادێ کانی دووردەست نیە بەڵکوو پڕە لەبابەت ونووسراوەکانی سایتی گیارەنگ بۆ خوێنەرانی وانە وێژە و خەمخۆری کوردان و پڕە لە هەست و سۆز و خۆشەویستی بۆ ماندوبوونتان .
براتان :
کەریم حاجی رەسووڵی ( م- زێڕە)
سوئێد یوتبۆری