یەكساڵەی رفاندنی مەولوود ئافەند لەژێر پەردەی ئیتلاعات و یەكێتیدا. هاوار بازیان
ئافەند كە رۆژنامەنووسێكی رۆژهەڵاتی كوردستان و هاوكات نەیاری ریژیمی كۆماری ئیسلامی بوو بەهۆی ئەو 2 تایبەتمەندییە پیشەیی و سیاسییەوە وەك پەنابەرێك پەڕێوەی باشوور بوو، لە رووداوێكی تەواو پلان بۆ دانراو لە سەردانێكی بۆ شاری سلێمانی بێ سەروشوێن كرا كە نێزیكەی یەك ساڵ بەسەر ئەو رووداوەدا تێپەڕ دەبێ، بێ ئەوەی هیچ چارەنووسێك لەو رۆژهەڵاتییە بێ كەس و لێقەوماوە لە باشووری وڵات دیار بێ. بەڵام ئەو پێشهاتە دوای یەك ساڵ چەندین راستی سەلماند، بەتایبەت بەسەرهاتی مەولوود ئافەند كە خۆی سەرنووسەری گۆڤارێكی وەك “ئیسرائیل-كورد” بوو، هەروەها چۆنیەتیی دیارنەمان و شوێنی رووداوەكە دنیایەك وردەكاری و گۆمانی لێكەوتەوە كە لە 3 بەشدا باسیان دەكەین لەوەی ئایا مەولوود بۆچی وای بەسەر هات؟ كێ لە پشت ئەو كارەوە بوو؟ داهاتووی كەیسی مەولوود چی بەسەر دێ؟
مەولوود بەپێی ئەوەی كار و ناسناوی پیشەكەی ناوی “ئیسرائیل”ی لەسەر بوو، لەلایەن دەزگاكانی هەواڵگریی كوردی و ناكوردی بەتایبەت ئیتلاعاتی كۆماری ئیسلامییەوە تەواو گرینگی پێ دەدرا و ژمارەیەك كەس و رۆژنامەنووسی لێ نێزیك كرایەوە تا كۆنترۆڵی بكەن. بەشێوەیەك كە چاودێریكردنی مەولوود و شوێنی مانەوە و هاتوچۆكانی وەك چاودێردیكردنی باڵوێزخانەیەكی ئیسرائیلی گرینگی هەبوو.
هەموو پێیان وابوو سەرجەم بازرگانەكانی ئیسرائیلی لە رێگەی نووسینگە یەك ژوورییەكەی ئەو گۆڤارەوە هاتوچۆ دەكەن، یان هەموو پڕۆژە ئابوورییەكانی ئیسرائیل لە كوردستان لەسەر لاپتۆپە 10 ئینچییەكەی مەولوود دانراون و تەندەرینگ كراون. هەبوو پێیان وابوو سەرجەم ڤیزاكانی چوون بۆ ئیسرائیل لەژێر پرینتەرە بچووكەكەی ژووری مەولوود چاپ دەكران. یان لەو بڕوایەدابوون كۆبوونەوە ئەمنییەكانی مۆساد لەبارەی ئێرانەوە هەمووی لەو ژوورە تەنگ و بچووكەدا بەڕێوە دەچوو. بەكورتی زۆركەس و لایەنی ئەمنی لەو بڕوایەدا بوون گۆڤاری ئیسرائیل-كورد خەریكی هەموو شتێكە بێجگە لە گۆڤار و كاری راگەیاندن!
ئەو روانینە هەڵەیە دەرفەتی گەورەكردنی مەولوود-ی وەك سەفقەیەكی باش خستە بەردەستی هێزە هەواڵگرییەكانی كوردی لە باشوور تا بەرامبەر دەزگای ئیتلاعاتی ئێرانی ئاڵوگۆڕی پێبكەن. هەرچەندە ئیتلاعات بەباشی ئاگەدار بووە لەوەی مەولوود لەو ئاستەشدا نییە كە كوردەكان بەرزیان كردووەتەوە، بەڵام لێرەدا پرسێكی گرینگتر هەیە كە ئەویش ستراتیژییەتی ئیتلاعاتە كە بەردەوام بەدوای دۆزینەوەی كەس و كەسانێكە بەجۆرێك پەیوەندییان بە ئیسرائیل و رۆژئاوا هەیە و لەژێر ئەو ناوەدا چالاكییەكی ئەمنی، ئایینی و سیاسیی بەرچاو ئەنجام بدات و هاوكات ئەو پەیامەش بە ناوەخۆی وڵاتەكەی و بەشێك لە دەرەوەی وڵاتیش بدات كە دەزگای ئیتلاعات لە ناسین و هەڵوەشاندنەوەی پەیكەری دەست و پەیوەندەكانی ئیسرائیلی و هەر هەواڵگرییەكی تردا هێزێكی باڵا و چاوێكی كراوە و وریای هەیە. (بوونی ناوی گۆڤاری ئیسرائیل-كورد و پەیوەندیی مەولوود بەو گۆڤارەوە زەمینەی ئەو كارەی دژی ئەو رەخساند)
لە كاتێكدا مۆسادی ئیسرائیلی و ئیتلاعاتی ئێرانی باشتر لە هەركەس و لایەنێك یەكتری دەناسن و لە توانای یەكتری شارەزان. هەروەها ئیسرائیل لە كوردستان كارە سیاسی و ئەمنییەكانی خۆی لە ئاستێكی زۆر بەرزدا ئەنجام دەدات كە رەنگە هەرگیز دەستی ئیتلاعاتیان پێ نەگات.
بەرامبەر كەیسی مەولوود و سەرخستنی ئەو نیازەی سەرەوەی ئیتلاعات كە باسی كرا، دەزگا هەواڵگرییەكانی یەكێتی نیشتمانی/دەزگای زانیاری و ئاسایش لە سلێمانی/ زیاتر مەیلی هاوكاریكردنی ئیتلاعاتیان هەبوو، چونكە ئیتلاعاتی ئێرانی لەگەڵ یەكێتیدا باشتر ئەو پرۆژەیان بۆ ئەنجام دەدرا. بەتایبەت كە لەو كاتدا پارتی دیموكرات و ئێران ماوەیەك بوو تووشی هەڵبەزینەوەی سیاسی هاتبوون جگە لەوەی یەكێتیی نیشتمانی زیاتر پێویستی بە وەرگرتنی باج لە ئیتلاعات هەبوو و لە روانگەی تارانەوە لە نێوان دەزگای پاراستن و دەزگای زانیاری-دا هەمیشە سەری دەزگای زانیاری بۆ ئیتلاعات نزمتر بووە.
دڵنیام ئەگەر مەولوود ئافەند ئەو سەردانەی 2012.6.8ی بۆ سلێمانی نەكردبووایە، ئەو رووداوە لە ناوچەكانی ژێر دەسەڵاتی دەرەوەی یەكێتیدا رووی نەدەدا، یان لانیكەم لە دۆخی ئێستەی ناوچەی ژێر دەسەڵاتی پارتی دیموكراتی كوردستاندا رێگەی سەرگرتنی پێ نەدەدرا.
مەولوود ئافەند نەیار و دوژمنی زۆری هەبوون كە بەشێكی مەترسیداریان هەر لە دەوروبەر و نێزیكی خۆی بوون. ژمارەیەكیان تا رادەیەك لێی نێزیك بوون كە متمانەی هەمووی شتیان لای مەولوود دروست كردبوو. كێشە دارایییەكانی گۆڤارەكەی مەولوود و زۆربوونی فشارەكانی هەواڵگری هاوكات بوون. لەو رێگەوە كەسانێك بەناوی كاری بازرگانی خۆیان لە مەولوود نێزیك كردەوە و وایان پێشان دا كە لە پێناو دابینكردنی سەرچاوەیەكی باشی ئابووری و دارایی بۆ گۆڤارەكە پێویستە بیر لە چالاكی ئابووری بكرێتەوە. مەولوود كەسی بازاڕ و كاسبی نەبوو و ئاگەدار نەبوو لەوەی بەشێكی ئەوانەی بە ناوی راگەیاندن یان بازرگانی لێی نێزیك دەبنەوە نیازێكی تریان هەیە. چەند مانگێك بەر لە رووداوی دیارنەمانی، نێزیكەكانی مەولوود وایان پێشان دەدا كە ئەگەر بەشێوەی كاتی واز لە راگەیاندن بێنێ و روو لە كاری بازرگانی بكات ئەوە هاوكات دەتوانێ بەشێوەیەكی تێروتەسەل گۆڤارەكەی چاپ بكا و هەروەها لەڕووی ئابوورییەوە دەبووژێتەوە. پێشتریش یەكێتی نیشتمانی بەڕەسمی 2 جار داوای داخستنی گۆڤارەكە و راگرتنی كاروبارەكانی كردبوو.
هەموو شتێكی مەولوود لەگەڵ كردنەوەی رێگەی چوونە سلێمانی رووی دا. بەشی چاودێری كۆمپانیاكانی تەلەفۆن سەرجەم پەیوەندییەكانی دوا ساتەكانی مەولوود و تا گەیشتن بە سلێمانییان لەلایە كە لەسەر داوای دەزگا هەواڵگرییەكانی هەرێمی كوردستان ئەو پرسە تا ئێستەش بێدەنگەی لێكراوە.
بەڵام رووداوەكە هاوكێشەیەكی ئاسانە! مەولوودی خاوەن ئیقامەی سیاسیی حكوومەتی هەرێم لەگەڵ گەیشتنی بۆ سلێمانی بێ سەروشوێن دەبێ. لە شوێنێكی ئەو شارە دیار نامێنێ كە بەهۆی كامێراكانی چاودێرییەوە رۆژانە دەیان وێنەی كچە كرێكاری چینی و بەنگلادیشی تۆمار دەكرێ، لەژێر ئەو دەسەڵاتەیدا كە نموونەی تیرۆركردنی سەدان كوردی دیكەی رۆژهەڵاتی تێدا تۆمار كراوە ئەویش بێ سەروشوێن دەبێ. لەو شارەی كە لەگەڵ رووداوەكە و دواتریش سەرجەم دەزگا هەواڵگرییەكانی یەكێتی نیشتمانی هەر لە دەزگای زانیاری تا بەڕێوەبەرایەتیی ئاسایشی ژێر دەسەڵاتی یەكێتی بڕیاری بایكۆتكردنی بەدواداچوونی ئەو كەیسە دەدەن. لەو شارەیدا كە حكوومەتی بەغدا یەك نوێنەرایەتیی تێدا نییە بەڵام 3 بارەگای ئاشكرای ئیتلاعاتی ئێرانی تێدایە. لەژێر دەسەڵاتی ئەو بەشەی كوردستان كە تێیدا خوێنی كوردی رۆژهەڵات ساڵانێكە سوور نییە و وەك ئاوی سپییە ئەویش خوێنی بە تاڵان دەفرۆشرێ.
دواتریش كە هەوڵی زۆر بۆ روونكردنەوەی ئەو كەیسە درا و كەمپین و ئیمزای بۆ كۆ كرایەوە و بەشێكی بەرچاو لە كەناڵەكانی راگەیاندن كاریان لەسەر كرد، بەڵام بەرپرسانی یەكێتی لەوەش پتر ملهۆڕیان كرد و گوتیان هەر ئاگاداری رووداوێكی لەو شێوەیە نین! بێ وەڵام مانەوەی ئەو هەمووە هەوڵ و تەقەلایە بۆ یەكلاكردنەوەی چارەنووسی كوردێك لە كوردستانی ئازاد بێجگە لەوەی دڵنیای كردینەوە دیسان كورد بەدەستی كورد پێشكێشی كوردكوژ كرایەوە، هەستێكی ناخۆشی بەهەمووان بەخشی.
بەڵام ئایا ئەو رووداوە هەروا بێ ئەنجام و سەرەداو دەمێنێ؟ بێگومان نەخێر. چونكە رفاندن و رووداوی زۆر لەوە گەورەتر بە تێپەڕبوونی كات روون بووەتەوە و سەرجەم وردەكارییەكانی پشتی ئاشكرا بووە. لەبارەی مەولوودەوە نیگەرانییەكە لەوەدایە تا ئێستە هیچ جۆرە ئیرادەیەك بۆ پەیداكردنی چارەنووسی ئەو رۆژنامەنووسە نییە. هیچ كەس و لایەنێك بەڕەسمی خۆی لەو رووداوە بەرپرس نازانێ، نازانم كەی بەڵام دڵنیام لەوەی رووزەردی هەر بۆ كوردفرۆشان دەمێنێتەوە.
*ئەم نووسینە لە گۆڤاری سڤیل/ ژمارە 184 بڵاو بووەتەوە.