جێژنی نەورۆز و ساڵی نوێێ ٢٧٢٠ی کوردیتان لێ پیرۆز بێ
له به‌ره‌به‌ری ده‌سپێکی ساڵی نوێدا، زۆر به گه‌رمی پیرۆزبایی نه‌ورۆز لە ئێوە خۆشەویستان، خەڵکی کوردستان، لە هاورێ و دۆستان و خزمان بە گشتی دەکەم، جوانترین و رازاوەترین گوڵی بەهاریتان پێشکەش دەکەم و هیوادارم کە ساڵی نوێ ساڵی بەگژداچوونەوەی دیکتاتۆری ئێران وڕەواندنەوەی هەموو نەهامەتی‌یەکانی ژیانی خەڵکی ڕۆژهەڵاتی کوردستان بێ و بە گشتی کوردستان بگاتە ڕزگاری و سەربەخۆێی یەکجاری.
نەورۆزی ئەمساڵ بە هۆی پەتا و ویروسی کۆرۆنا ڕەنگ و بۆن و بەرامی ساڵانی پێشووی نییە، بەڵام بۆ ئەوەی هەموومان ڕەنگ و بۆن و بەرامی نەورۆزێکی دیکە ببینین، بۆ ئەوەی کۆمەڵگا لە ئاست ئەم هەرەشە نادیار و پڕ مەترسی‌یە ڕزگاری بێ، پێویستە هەموومان بە یەکەوە لە ماڵەوە بمێنینەوە، بە مانەوە لە ماڵەکاندا دەتوانین خۆمان و دەوروبەرمان لە پەتای ویروسی کۆرۆنا بپارێزین، بێ‌شک دوای پاک بوونەوەی ئەم ویروسە، هەموومان چاکتر دەتوانین بە ئەرکەکانی دیکەمان ڕابگەین.
بۆ ئێمه خه‌باتگێڕانی رێگای ئازادی کوردستان، نه‌ورۆزو بەهار بە ته‌نیا جێژنی نوێبوونه‌وه‌ی ساڵ نییه، بەڵکووکاتی جوڵان و دارشتنی پلان و به‌رنامه‌ی تێکۆشان بۆ ساڵێ نوێ‌یە و لە هەمانکاتدا کاتی بەڵێن نوێکردنەوەیە بۆ ئەوەی بە یەکەوە هەوڵ بدەین کارە ناتەواوەکانی ساڵی پێشوومان بە باشترین شێوە بەرێوەبەرین.
جێگای خۆیەتی لێرەدا پیرۆزبایی لە بنەماڵەی سەربەرزی شەهیدان و زیندانیانی سیاسی و خەڵکی بە ئەمەگ و تێکۆشەرانی کوردستان و بە تایبەت پێشمەرگەکانی کوردستان بکەین و یادی سەروەری‌یەکانی ئەو توێژە لە شۆڕشی ڕزگاریخوازی گەلەکەمان دا بکەینە کە لە هەموو بارودۆخێک دا و لە ژێر هەموو قەیرانەکان دا خۆیان ڕاگرتووە و هەنووکەش بوێرانە لە سەفی پێشەوەی ئەم خەباتەدا تێکۆشانیان هەیە.
سوپاس و پیرۆزبایی لە هەموو ئەو کەسانە دەکەم لە ماوەی ساڵی ڕابردوو دا لەگەڵ خۆشی و ناخۆشی‌یەکانی گەلەکەمان بوون، سوپاسی هەموو ئەو کەسانە دەکەم کە لە ماوەی ساڵی ڕابردوودا خەمخۆرانە و دڵسۆزانە کاریان بۆ دۆزی ڕەوای گەلەکەیان کردووە .
سوپاس بۆ ئەوانەی کە بابەت و نووسراوەیان بۆ ماڵپەری گیارەنگ ناردووە و هاوکات بە ڕێنوێنی و تێ‌بینی و پێشنیارەکانیان بە پشتیوانی ماددی و مەعنەویان ماڵپەری گیارەنگیان لە سەر پێ ڕاگرتووە.
ساڵی نوێتان لێ پیرۆز بێ.
حەمەرەسووڵ کەریمی
ماڵپەری گیارەنگ
٢٩ ـ ١٢ ـ ١٣٩٨ ی هەتاوی
١٩ ـ ٠٣ ـ ٢٠٢٠ی زائینی