شەهیدانی ٢٣ی گەلاوێژ، ڕەچەشکێنانی قۆناغی نوێی خەباتی پێشمەرگانەی گەلەکەمان.
شەهیدانی ٢٣ی گەلاوێژ، ڕەچەشکێنانی قۆناغی نوێی خەباتی پێشمەرگانەی گەلەکەمان
حەمەڕەسووڵ کەریمی
لە ١٦ ساڵەی شەهیدانی ٢٣ی گەلاوێژی ١٣٨٧ (شەهیدان هەمزە سارتکەیی، قادر نەزمی و قادر قادری)دا سەری ڕێز و پێزانین بۆ گەورەیی و چاونەترسییان دادەنوێنم، ئافەرین و سەدان ئافەرین بۆ ئەو پۆلە پێشمەرگە خۆنەویستانەی بە حزووری پێشمەرگانەیان زەندەقی کۆماری ئیسلامیی ئێرانیان برد و بوونە مۆمی داگیرساوی شەوی تار و بوونە گوڵی دەستی ئەویندارانی ڕێگای ئازادیی کوردستان و ڕچەی قۆناغێکی نوێی خەباتی سەروەریخوازییان بۆ هێزی پێشمەرگە و خەڵکی کوردستان شکاند.
ئەمساڵ ٧٩ ساڵ بە سەر دامەزرانی حیزبی دێموکراتی کوردستانی ئێراندا تێدەپەڕی، حیزبێک کە خاوەنی هەشت دەیە لە خەبات و تێکۆشانە بۆ ڕزگاری گەلەکەی لە ڕۆژهەڵاتی کوردستان. ئەم حیزبە لە ماوەی نیزیک هەشت دەیە تێکۆشانی خۆیدا، هەوراز و نشێوی زۆری بڕیون و قۆناخە جۆراوجۆرەکانی خەباتی بە سەربەرزی و شانازییەوە تێپەڕاندوە و لە پێناو ئازادی و ڕزگاری گەلدا بە هەزاران شەهیدی سوورخەڵاتی پێشکەش بە بارەگای گەل و نیشتمان کردوە. هەر لە درێژەی ئەو خەبات و خۆڕاگرییە پڕشکۆیەدا و لە مانگی گەلاوێژی ساڵی ١٣٨٧دا، پۆلێک لە کادر و پێشمەرگە گیان‌لەسەر دەستەکانی حیزبی دێموکرات بە فەرماندەیی پارتیزانی لێزان و خۆشناو هەمزە سارتکەیی، بەرەو شوێنی خەباتی ڕاستەقینەی خۆیان، بۆ قووڵایی خاکی ڕۆژهەڵاتی کوردستان وەڕی کەوتن. ئەو دەستە لە کادر و پێشمەرگەکان دوای ساڵانێک دووری لە نیشتمان و بە حزووری پێشمەرگانەیان و، بە هیممەتی چیائاسای خۆیان شەوەزەنگی بێدادیی ڕێژیمی ئێرانیان دڕ دا.
هەمزە سارتکەیی وەک کادر و فەرماندەیەکی دیاری حیزبی دێموکرات، بە هاوڕێیەتی پۆلێک پێشمەرگەی فیداکار سەرەڕای مەترسییەکانی سەر ڕێگا و سنووری دەستکردی نێوان باشوور و ڕۆژهەڵاتی کوردستان، توانییان کەژ و کێو و ڕووبار و چۆم و هەورازەکان ببڕن و خۆیان بگەیەننە باوەش و ئامێزی گەرمی خەڵکی ناوچەکانی سەردەشت، ڕەبەت و مەهاباد و بە بوونیان چەخماخەی شۆڕشێکی نوێی دیکە لێ بدەن و ببنە مزگێنیدەری هەڵگیرسانەوەی خەبات و تێکۆشان لە گوند و شارەکانی کوردستان.
ئەو پۆلە ئەستێرە گەشەی نێو شۆڕشی ڕزگاریخوازیی گەلەکەمان زۆر زوو توانییان بە سەردان و دیدارەکانیان پەیامی شۆڕش و ڕزگاری و پەیامی هێزی پێشمەرگەی کوردستان بگەیەننە خەڵکی تامەزرۆی ئازادی کوردستان و بە لێزانی و شارەزایی خۆیان دیدارەکانیان لەگەڵ خەڵکی گوندەکان، لە هەوار و مەزراکان و لە نێو باخ و کوێستان و ڕەزەکاندا نوێ بکەنەوە. حزوور و بوونی ئەو پۆلە پێشمەرگەیە دوای ساڵانێک دابڕان و نەچوونەوەی هێزی پێشمەرگە بۆ نێوخۆی ڕۆژهەڵاتی کوردستان وەک هەورە بریسکە نەک هەر لە ناوچەی سەردەشت و ڕەبەت بەڵکوو لە هەموو کوردستان و ئێراندا دەنگی دایەوە.
بڵاوبوونەوەی هەواڵی لە مەیداندابوونی هێزی پێشمەرگە و دیدار و چاوپێکەوتنەکانیان لەگەڵ خەڵکی کوردستان بوو بە هۆی ئەوە کە پۆل پۆل خەڵکی تامەزرۆی دیدار لەگەڵ پێشمەرگە خۆ بگەیەننە نێو باخ و کوێستان و ئەو شوێنانەی بۆنی حزووری پێشمەرگەی لێ دەهات. ئەگەر لەلایەک خەڵک بە دیتنی پێشمەرگەکانی شاییان لە دڵدا دەگەڕا، لە لایەکی دیکەوە بە بوونی سەدان مۆڵگە، پادگان، بنکەی سیخوری و جاشخانە مەترسی لەسەر گیانی پێشمەرگەکانیش هەبوو و لە هەمان کاتدا ترس و خۆفی زۆری لە دڵی ترسنۆکانی ڕژێمی تاران خستبوو، هەر بۆیە ڕژێم بە ناردنی هێزی زۆر و هەروەها وەگەڕ خستنی شەیتان و شۆڤار و جاش و جاسووسەکانی کەوتە پیلان داڕشتن بۆ ئەوەی ئەو پۆلە پێشمەرگەیە لە داو بخەن.
پارتیزانە چەک لە شانەکانی حیزبی دێموکرات بە وریایی و وشیاری خۆیان و بە هاوکاریی دۆست و لایەنگر و ئەندامانی حیزبی دێموکرات، جەولەیەکی سیاسی و تەشکیلاتیی زۆر بەهێزیان لە نێو جەرگەی ناوچەدا لێدا و ئەوەندەی کە پێویست بوو، بۆ ئەوەی لە داوی هێزەکانی ڕژێم نەکەون، هەڵسووڕانەکانی خۆیان سنووردار کردبوو. پارتیزانەکانی دێموکرات، لە گوندەکان و لە مزگەوتەکان، لەسەر جادەی نێوان شار و گوندەکان بۆ موسافیر و ڕێبوار و هەموو ئەو کەسانەی کە تووشیان دەبوون، سیاسەتەکانی حیزبی دێموکرات و کردەوە قێزەونەکانی کۆماری ئیسلامی ئێرانیان بۆ ڕوون دەکردنەوە و بە دیدار و بە وتەکانیان خەڵکیان زیاتر لە دەوری خۆیان کۆ دەکردەوە. فیلمەکانی بەشی ڕاگەیاندنی حیزب لەم جەولەیەدا نیشان دەدا کە گەورە و بچووک، ژن و پیاوان و کوڕ و کچانی کوردستان بە سروودی “هاتنەوە، هاتنەوە، پێشمەرگانی دێموکرات” و بە سروودی “وا هاتن پێشمەرگەی مە” پێشوازیی گەرمیان لە ڕۆڵەکانی خۆیان دەکرد.
پێشمەرگەکانی دێموکرات لە ماوەی زیاتر لە سێ حەوتوو مانەوەیاندا، بە چوونەسەر جادەی ئەسڵیی نێوان شارەکانی سەردەشت، ڕەبەت، بانە، مەهاباد و پیرانشار لەژێر گۆشار و هێرشی جۆراوجۆری ڕێژێمدا، سەلماندیان کە دەتوانن لە هەموو قۆناخێکدا هەنگاوەکانیان بۆ ڕزگاریی کوردستان پتەوتر بکەن، ئیرادەی بەرزی ئەو پۆلە پێشمەرگەیە، بەرپرسانی سەرووی ڕێژیمی ئێرانی هێنابووە سەرخەت و ڕێژیم لە ڕێگەی هەوایی و عەرزییەوە لە ڕێگەی خۆفرۆش و جاش و خائینانەوە پێوشوێنی پێشمەرگەکان کەوتبوو، و پیلانێکی ڕەشیان بەدەستەوە بوو.
پێشمەرگەکان بڕیار دەدەن بۆ جێژنی ٢٥ی گەلاوێژ بگەڕێنەوە لای هاورێیانیان لە دەفتەری سیاسی و بنکەکانی حیزبی دێموکرات لە کۆیە. دوژمنی داخ لە دڵ و ترسنۆک کە هێز و ورەی ڕووبەڕووبوونەوەیان لەگەڵ ئەو پۆلە پێشمەرگەیە نەبوو، لە بیری داڕشتنی لەداوخستنی فەرماندە باڵابەرزەکەی دێموکرات و هاوڕێیانیدا بوو. تیمی پێشمەرگەکان ڕۆژی ٢٢ی گەلاوێژ لە ناوچەی ڕەبەت ڕا، ئەو شوێنەی کە بە سەدان جار هەمزە سارتکەیی و هاورێیانی لمبۆزی دوژمنیان لە خۆڵ وەردا بوو، بەرەو ناوچەی سەردەشت کەتبوونە ڕێ، بەڵام بەداخەوە ئێوارەی ڕۆژی ٢٣ی گەلاوێژ لە نزیک گوندی گردێنە لە ناوچەی سەردەشت کەوتنە بۆسەی شەوپەرەست و جاش و خائینانی خۆفرۆش و لە تێکهەڵچوونێکی کورتدا مخابن کاک هەمزە سارتکەیی، قادر نەزمی و قادر قادری شەهید بوون و چوونە ڕیزی کاروانی نەمرانەوە.
شەهید هەمزە سارتکەیی و هاوڕێیانی بە خوێنی سوور و گەشی خۆیان پەیامی هەستانەوەی شۆڕش و خەباتی ڕزگاریخوازی و نەتەوەیی کوردیان بە گوێی ئەویندارانی ڕێگای ڕزگاری کوردستاندا چپاند و دوای زیاتر لە دە ساڵ دابڕانی حزووری هێزی پێشمەرگەی کوردستان، ئەوان بوونە یەکەم مەشخەڵی دەستی لاوانی کورد.
شەهیدان هەمزە سارتکەیی، قادر نەزمی و قادر قادری شەهیدانی مانگی گەلاوێژ و شەهیدانی هەستانەوەی هێزی پێشمەرگەی دێموکرات بوون و دواتر هاوڕێ و هاوسەنگەرانی شەهیدان دەیان جەولەی سیاسی و نیزامی و تەشکیلاتی دیکەیان هەر لە خواروی کوردستان تا سەرووی کوردستان بەڕێوە برد و زۆر گەلەئەستێرەی دیکەش هەر لە سنە و کرماشانەوە بگرە تا سەقزی خوێناوی و شنۆی شەهیدان و سەردەشت و ڕەبەت و پیرانشار و مەهاباد ڕاخوشین و بە خوێنی خۆیان ڕێگەی خەبات و تێکۆشانیان واڵاتر کرد.
سڵاو لە شەهیدانی کورد و کوردستان و بەتایبەت شەهیدانی ٢٣ی گەلاوێژی ١٣٨٧ی هەتاوی
ڕووڕەشی بۆ جاش و خائین و خۆفرۆشان