کوردانە چیرۆک… برایم فەڕشی
کوردانە چیرۆک… برایم فەڕشی
گەر ڕۆژ و شەو
سێ بۆ پێنج کەڕەت
پێنج بۆ حەوت ڕەکەت
لە سەر بەڕماڵی نیشتمان
نەوای ئازادی بەرگوێ کەوتبا
گەر ساڵ و هەموو ساڵ
سی ڕۆژ و سێسەدوسی
ڕۆژوو
لە گوتنی زمانی
عەجەم و عاڕەب و تەتەر گیرابا
گەر ساڵ دوازدە مانگ
نە کەعبەی ئێرە و ئەوێ
مەزاری سەربازی ون
لە ژێر دار و بەرد و سەر شاخ
زیارەت کرابا
گەر ساڵ و گشت ساڵ
نە قوربان
جەژنی بوونی ئاژەڵ
لە مەزرا و باخان
گیرابا
گەر ماڵ بە ماڵ
نە ڕەمەزان
جەژنی بوونی مرۆڤ
لە هەر وەرزی ساڵ
گیرابا
گەر ساڵ دوای ساڵ
نە سەرفترە، زەکات و سەدەقە
یەکسانی، تێگەیشتن
کەرامەت
دابەشکرابا
گەر سەدە و هەزارە
نە بۆجیهاد
بۆ ئازادی
باوەڕی تاک و کۆ
هاوار کرابا
گەر ڕۆژ، ساڵ و سەدە، هەزارە
نە بۆ دورگەی دووردەست
بۆ دوندی چیا
دەشت و پێدەشتی وڵات
کڕنۆش برابا
گەر کورد
نە ڕوو لە ئاسمان
ڕوو لە زەوی خۆی دیتبا
هەمە ڕەنگ خۆی گرتبا
ئەستێرەی کیانی لە سەر زەوی
دەدروشایەوە!
برایم فەڕشی
بەرەبەیان – ٢٨/٥/٢٠٢٢