کۆچی دوایی دایە ئایشێ شەمعی دایکی شەهید محەممەد پەردەدار لە شاری سەردەشت
کۆچی دوایی دایە ئایشێ شەمعی دایکی شەهید محەممەد پەردەدار لە شاری سەردەشت
بە پێی هەواڵی گەیشتوو دایە ئایشێ شەمعی دایکی شەهید محەممەد پەردەدار و هاورێی تێکۆشەر کاک خالید پەردەدار دوای ماوەیەک بەربەرەکانی لەگەڵ نەخۆشی ڕۆژی یەک شەممە ڕێکەوتی ٠٥ ـ ١٢ ـ ٢٠٢١ ی زائینی لە شاری سەردەشت کۆچی دوایی کرد.
دایە ئایشێ لە گوندی میر شێخ حەیدەر لە دایک دەبێ و هەر لەو گوندەش ژیانی هاوبەش پێکدێنێ و دواتر ماڵیان دەگوازنەوە بۆ شاری سەردەشت، دایە ئایشێ ژنێکی تێگەیشتوو و خەمخۆر و گەلدۆست بوو، دایکێکی دڵسۆز بۆ منداڵەکانی و بۆ هەموو ئەو کەسانە بوو کە لە نزیکەوە دەیانناسی، لە ئامێزی گەرمی دایکانەی خۆیدا، چەندین ڕۆڵەی تێکۆشەری پەروەردە کردن و بە گشتی لە پێناو ڕزگاری گەلی کورد دا کوڕەکانی بوونە پێشمەرگە و لە خەبات و تێکۆشان دا وەک کادر و فەرماندە خزمەتێکی زۆریان بە حیزبی دێموکراتی کوردستان کرد، دایە ئایشێ لەو پێناوە دا ئازاری زۆری چێشت و زۆرجار لە لایەن جاش و خۆفرۆشانەوە بێ حورمەتی پێکراوە و هەڕەشەی لێکراوە و ئەویش بوێرانە بەگژیان دا چۆتەوە و شانازی بە کوڕەکانی‌یەوە دەکرد.
لە درێژەی خەبات و تێکۆشان دا یەکێک لە کوڕەکانی بە ناوی محەممەد پەردەدار لە ساڵی ١٣٦٤ی هەتاوی لە یەکێک لە شەرە گەورەکانی ناوچەی سەردەشت لە نێوان توژەڵ و نێوزەنگ لە ڕێکەوتی ٠٧ ـ ٠٩ ـ ١٩٨٥ ی زائینی دا، دوای شەڕێکی قارەمانانە شەهید بوو، شەهید محەممەد سەردەستەی دەستەی زەربەتی هێزی شەهید موعینی بوو کە بە دەیان جار زەربەی زۆر قورس و کاریگەری لە پەیکەری دوژمن دابوو و کاتێک هەواڵی شەهیدبوونی بڵاو بۆوە خەمێکی گەورەی خستە نێو دڵی خەڵکی کوردستان و بە تایبەت خەڵکی ناوچەی سەردەشت.
دوای بڵاو بوونەوەی هەواڵی شەهید بوونی محەممەد پەردەدار، یەکێک لە براکانی بە ناوی خالید پەردەدار ناهێڵێ چەکی براکەی بکەوێتە سەر عەرز و دەبێتە پێشمەرگە و دواتر بە هۆی لێهاتوویی وەک فەرماندە و سەرپەل و کادری نێوشاری سەردەشت دیاری کراو و زۆر بوێرانە و قارەمانانە یەک دەیە وەک کادر و پێشمەرگە خزمەتی کرد و هەنووکەش وەک کەسێکی هەڵسوور و چالاک لە ئوسترالیا خزمەت بە گەل و نیشتمان دەکا.
دایە ئایشێ ژنێکی چاونەترس و بوێر بوو، هەر بۆیەش کوڕەکانی لە کاتی پێشمەرگایەتی دا لە ئازاترین پێشمەرگەکانی حیزب بوون، ئەوانەی لەگەڵ کوڕەکانی پێشمەرگە بوون شاهیدی بۆ بوێری و قارەمانەتی و هەڵمەتبەریان دەدەن و کەم پێشمەرگە هەبوون کە لە جەولە و لە کار و تێکۆشانی حیزبی دا هێندە ئامادە و لەسەر پێ بووبن، دایکێک کە هەموو ناخۆشی‌یەکانی کوڕەکانی بە دڵ قەبووڵ کردبوو، لەگەڵیان دەژیا و تەنیا خەمی کوڕەکانی خۆی نەبوو بەڵکوو لە هەر شوێنێک پێشمەرگەیەک بریندار بایە و یا شەهید بوایە خەمی بۆ هەڵدەگرت و بە دڵەوە بۆیان بە پەرۆش دەبوو.
دایە ئایشێ بە جەستە لە نێومان ڕۆیشت بەڵام یاد و ناو و بیرەوەری و گەورەیەکانی لە یاد ناچنەوە و هەردەم لە دڵان دا بە زیندوویی دەمێنێتەوە.
بە بۆنەی کۆچی دوایی دایە ئایشێ سەرەخۆشی لە کاک خالیدی هاورێی هەموو قۆناخەکانی ژیانم و کوڕ و کچەکان و خوشک و براکانی دایە ئایشێ و گشت خزمان دەکەم و خۆم بە شەریکی خەمی لە دەستدانی دایە ئایشێ دەزانم، بە هیوای ئەوە کە کاک خالیدی برام و خزمان بە گشتی تەمەن درێژ و ساخ و سەلامەت بن.
حەمەڕەسووڵ کەریمی