ڕێزگرتن لە شەهیدان، وەفاداریە، نەك دواکەوتوویی و لادان لە ڕێبازی سیاسی، محمد سلێمانی
ڕێزگرتن لە شەهیدان، وەفاداریە، نەك دواکەوتوویی و لادان لە ڕێبازی سیاسی، محمد سلێمانی
ڕێزگرتن لە ڕۆژی شەهیدانی کوردستان، نەك دواکەوتووی نیە، بەڵکوو وەفاداریە بە ڕێبازی سیاسی و نەتەوەیی ئەو تێکۆشەرانەی لە پێناوی ئازادی کوردستاندا گیانی بەنرخیان بە کوردستان بەخشیوە.
ڕێزگرتن لەو ڕۆژە مێژوویە، نەریتێکی پاشکەوتوانە نیە و کۆمەڵگەی کوردستان بەرەو دواوە ناباتەوە، بەڵکوو نیشانەی وەفاداری و ڕیزگرتنە لە خوێنی ئاڵیان کە لە پێناوی ئازادی و سەربەستیدا تێکەل بە خاکی پیرۆزی نیستیمان بووە.
بەداخەوە کۆمەڵە و هاوفیکرانیان لە کوردستان، زیاتر لە چواردەیە لەمەوەبەر ئامانجە سیاسی و نەتەوەییەکانی بزووتنەوەی کوردستانیان پێ دواکەوتووانە و بێ سەمەرە بوو و بە شەرمێوونیەوە بە لای مەسەلەی نەتەایەتیدا دەرۆیشتن. دوای بێ بازاڕی دیکتاتۆری پڕۆلیتاریا بایاندایەوە بۆ لای مەسەلەی نەتەوەیی کە بە کارێکی باشی دەزانین و هەردەبێ ئەوەشیان کردبا کە لە کۆمەڵگای کوردستان دانەبڕێن.
بەڕاستی مرۆڤ نازانیت پێناسەی ئێوەمانان لە نێو کۆمەڵەدا چیە بۆ دواکەوتوویی و پاشکەتوویی!
ڕێز گرتن لە شەهیدان بۆ دەبێت مەترسی دواکەوتوویی لە سەر کوردستان تەماشا بکرێت، بە دڵنیایەوە ئەو هەڵسەنگاندنە هیچ جۆرە بنەمایەکی ژیرانەی نیە و بەدوور نیە لە دەمارگرژی سیاسی و دژایەتی پێگە و نفووزی حدکا.
دەبێت لە ڕۆژێکی ساڵدا ڕێز لە شەهیدەکانمان بگرین و پەیمانی وەفاداری لە گەڵ ڕێگای خەباتیان نوێ بکەینەوە، ئیدی ئەگەر وەك حیزب ئەوە بکەین و داوا لە خەڵکی کوردستان بکرێت، بۆ دەبێت هێندێك ئەندامی کۆمەڵە پێیان شتێکی خراپ و پاشکەوتوانە بێت و لۆمەی حیزب لەسەر ئەو هەڵویستەی بکەن و هەوڵی شلوێ کردنی بارودۆخی سیاسی لە کوردستان بدەن.
بەڵی حدکا بە ئەرکی سیاسی و نەتەوەیی خۆی دەزانێ ڕێز لە شەهیدانی ڕێگای رزگاری و ئازادی کوردستان بگرێ و ڕۆژێکی ساڵ وەك دەرفەتێك بۆ پەیمان نوێ کردنەوە لە گەل ئامانجە سیاسیەکانیان کە ڕۆژی ١٠ی خاکەلێوەیە دیاری کردووە.
زۆر سروشتیە داواش لە خەڵک بکات ئەو ڕۆژەی بە تایبەتی تر ڕێز بگرن و سەردانی کەس و کاری شەهیدان بکەن.
حدکا و ڕێبەرانی گەورەمان دەمێکە ئەو مەسەلەیان بڕیوەتەوە کە ئێمە بۆ شەهیدەکانمان ڕەش ناپۆشین و خۆمان لە شایی و هەڵپەڕین نابوێرین، حدکا هەر بە قسە و شوعار ئەوەی ناڵێت، بەکردەوە نیشانمانداوە و کۆمەڵانی خەڵکی کوردستانیش شاهیدی ئەوەمان بۆ دەدەن.
لە کاتێكدا ڕێژیمی تاران لە داڕمان و داڕوووخان نزیکتر بۆتەوە و هەلومەرجێکی نوێ لە بەرژەوەندی شۆڕشی کوردستاندا هاتۆتە ئاراوە و دەرفەتێكە کە کورد لازمە سوودی باشی لێ وەربگرێ و نێوماڵی خۆی ڕێکبخات و خۆمان بەدوور بگرین لە ژاوە ژاوی سیاسی و ڕێکخراوەی.
حیزبی دێمۆکڕات و کۆمەڵەش بە هەستکردن بە بەرپرسیارەتی سیاسی و نەتەوەیی لەو بەشەی کوردستاندا، بۆ چەند ساڵێك دەبێت هاوپەیمانەتیەکی سیاسی و ستڕاتیژیان بە یەکەوە واژۆ کردوە بۆ ئەوەی پێش بە ئەگەری هەر بەریەك کەوتنەوە بگرن لە داهاتوودا.
بەداخەوە بەشێك لە ئەندامان و لایەنگرانی کۆمەڵە بە شێوەیەکی بەرنامە بۆ دانراو هێرشی بەربڵاویان بۆسەر حیزب دەست پێکردوە و کۆمەڵێک چەمك و دەستەواژەی ئەوتۆ بەکار دەێنن کە بە داخەوە هەر لە خۆیان دێتەوە و بێگومان بەو کارەیان جگە لە خوێ کردنەوە ناو برینەکان و قووڵتر کردنەوەی ناکۆکیە سیاسی و کۆمەڵایەتیەکان و بەداخەوە خەڵکی کوردستان ناتوانێ دروێنەی باشی لێ بکات و جگە لەوەی مەترسی ڕاستەوخۆ لەسەر تەبایی و کۆدەنگی نەتەوەیی لە ڕۆژهەڵاتی کوردستان دادەنێت، زیان بە برایەتیش دەگەیەنێ.
دەبوو ئەو بەرێزانە بە سینگ فراوانی و ڕیزگرتن لە فرە ڕەهەندی سیاسی و کۆمەڵایەتی ئەو داواکاریەی حیزب لە خەڵکی کوردستان وەری بگرن و زۆریش سروشتیە لە نێو گەلانی تریشدا کە ڕێز لە سەمبوولە سیاسی و شۆڕشگێرایەکانی خۆیان بگرن و حدکاش وەك هێزێکی دیار و کاریگەری نێو بزووتنەوەی سیاسی کوردستان، مافی خۆیەتی لە ڕۆژێکی ساڵدا، وەك پەیمان نوێکردنەوە لە گەڵ شەهیدانی ڕیگای ئازادی و ڕزگاری نەتەوەیی ڕێزبگرێ و داواش لە خەڵکی کوردستان بکات لەو ڕۆژەدا بەسەردانیکردن لە بنەماڵەی شەهیدان، پەیمان لە گەڵ ڕێگا و ڕیبازی سیاسیاندا نوێ بکەنەوە و درێژەدەری بەوەفای رێگای خەباتیان بین.
ئەوە نەك هەر شتێکی پاشکەوتوانە نیە، بەڵکوو ڕیزگرتنە لە جەوهەری ئەو خەباتەی کە بە خوێنی ڕۆڵەکانمان بە ئەمڕۆ گەیشتووە و مەشخەڵانی ڕزگاری و سەمای ئازادی و جامانەکان لە نەورۆزدا، بێگوومان خەرمانەی خوێنی ئەو شەهیدانەی کوردستانە کە وەك قۆناخێك لە خەباتی سیاسی سەیری دەکەین و بەتەواوی دوورە دیمەنی سیاسی و کۆمەڵایەتی ڕۆژهەڵاتی کوردستانی گۆڕێووە و ناوەندی بریاری سیاسی و سەربازی تارانی بەتەواوی لەرزاندووە.
مرۆڤی سیاسی و نەتەوەیی هەرگیز هەوڵی بێ ڕێزی و تێکدانی تەبایی و یەکیەتی سیاسی نادا و ئەو کارەش بەدڵنیایەوە جگە لە خۆش خزمەتی بە دەسەڵاتی تاران خێرێك بە کۆدەنگی سیاسی لە ڕۆژهەڵاتی کوردستان ناگەیەنێت و ڕێبەری کۆمەڵە دەبێت سنوورێك بۆ ئەو بێڕیزیانەی ئەندامانی بە حیزب و جووڵانەوەی سیاسی کوردستان دابنێت.
بەداخەوە ژمارەیەکی زۆر کەم لە ئەندمانی کۆمەڵە ئەوە جاری یەکەم و بێگوومان دواجاریان نابێت کە بەو جۆرە هێرش دەکەن و سنووری ئەخەلاقی سیاسی بەرامبەر بە حدکا و شەهیدانی دەبەزێنن و لە گومڕایدا بە تەواوی خۆیان بزر کردووە و خەریکە بەو ڕێگایەدا سەریان لە کوچە تاریکەکانی خەیاڵدا دەربێنەوە.
با تۆزێك ڕاشکاو و ڕوون لە گەڵ یەکدیدا قسە بکەین، حیزبی دێمۆکراتی کوردستانی ئێران بە سەرچاوەی هزری سیاسی و نەتەوەیی ناسراوە و خەڵکی کوردستان بە هەڵوێستە سیاسیەکانیان لە شۆڕشی ژینا و نەورۆزی ئەمساڵدا بە تەواوی متمانەی سیاسی یان بەو حیزبە داوە و بە تیروتوانج تێگرتنی ژمارەیەك لە برایانمان لە نێو کۆمەڵە لەبەرچاوی خەڵك ناشیرین ناکرێت و لەو پێگە بەهێزەی کەخاوەنیەتی نادرێت و زیاتر خۆشەویست دەبێت.
خەڵکی کوردستان بە خۆشیەوە بەو ڕادەیە لە وشیاری سیاسی گەیشتووە کە بزانێ کام هێزی کوردستان بە تەواوی لە پێناوی خەڵكدا تێدەکۆشێ و بە هەڵوێستێك یان بڕیارێکی سیاسی لابەلا زیانی بە خەبات و بەرەوپێشچوونی بزووتنەوەی کوردستان گەیاندووە.
حیزبی دێمۆکڕات لەو ڕۆژەیدا واتە ١٠ی خاکەلێوە ڕێز لە شەهیدانی ڕیگای ئازادی و ڕزگاری کوردستان دەگرێ و تەنانەت ئەو کادر و پیشمەرگەی کۆمەڵەش کە لەسەنگەری خەبات بەدژی دەسەڵاتی تاران شەهید بوون، ڕێزیان لێ دەگرێ و لێرەدا هیچ جۆرە هەڵاواردنێکی سیاسی و ڕێکخراوەی بە دروست نازانێ و نایکات.
لەو ڕۆژەدا، کە ڕۆژی پەیمان نوێکردنەوەیە لە گەڵ خوێنی تێکۆشەرانی کوردستان، هەوڵی تەبایی و پێکەوە هەڵکردن بدەین و کارێك نەکەین درز بخەینە نێومان و سەر لە خەڵکی کوردستان بشێوێنین و تێکدانی تەبایی لە نێوان هێزەکانی کوردستاندا، بەدڵنیایەوە شەقامی کوردستان بێزار و تۆرە دەکات.
لە جیاتی بەرهەم هێنان و پەرەپێدان بەو دەمارگرژیە ڕێکخراوەیە لە کوردستان، لە سەر بە هێزکردنی بیری نەتەوەیی و کۆدەنگی سیاسی و نیشتیمانی لە کوردستان کاربکەین، چوونکی ئەوە تەنیا ڕێگای خزمەت کردنە بە جووڵانەوەی سیاسی گەلی کورد و بەرەوپێشبردنی کۆمەڵگای کوردستان.
جووڵانەوەی سیاسی کورد کاتێك بە ئامانجەکانی دەگات کە یەکگرتووی سیاسی و ئاشتی کۆمەڵایەتی لە ڕۆژهەڵاتی کوردستاندا بەهێز بکرێت و بە هەموو لایەکیش ئەو برایەتیە لە نێوان هیزەکاندا بپارێزین و ڕێژیمی تاران بە یەك چاوی سەیری حیزب و کۆمەڵە و هێزەکانی دیکەی ڕۆژهەڵات دەکا و ئەو کاتە دڵیان خۆشە کە لە دونیای مەجازیدا، دەکەوینە شەڕە دندووکە و وێک هەڵناکەین.
شەڕ و ناکۆکی قووڵکردنەوە کردارێکی نەفرەت لێکراوە و ئەگەر قەراربێت دژی بین، نابێت زەمینەی دووبارە بوونەوەی بۆ نەرەخسینینەوە و بە قسە و کردار زیان بە هاوکاری نێوانمان نەگەیەنین.
بێگوومان بەیانی توند و هێرشکردنە سەر لایەنی بەرامبەر و ڕەچاو نەکردنی هەستی تەبایی و یەکگرووتویی نێوخۆی لە ڕۆژهەلاتی کوردستان، جگە لە جووڵانەوەی ساویلکە و هەرزەکارانە، ناکرێت ناوێکی دیکەی لەسەر دابنرێت.
ئەو بەڕێزانەی ڕەخنەی توند لە حیزبی دێمۆکڕات دەگرن ، کە کەسانێک بە ناوی چالاکانی مەدەنی داوایان لە خەڵکی کوردستان کردووە لە ڕۆژەکانی ٩ و١٠ی خاکەلێوەدا بەسەردانیکردنی بنەماڵەی سەربەرزی شەهیدان، وێرای ڕێزگرتن لە ڕابردوویان، پەیمان لە گەڵ ئامانج و خەباتە سیاسیەکەیاندا نوێ بکرێتەوە، ئەوە نەك شتێکی بەجێیە، بەڵکوو برایانمان لە نیو کۆمەڵەی نەدەبوو بەو جۆرە و دەمارگرژانە بابەتەکەی بەلاڕێدا بەرن و دژایەتی ڕۆژی شەهیدانی کوردستان بکەن کە لەو ڕۆژەیدا پێشەوای مەزن بە دەستی دەسەلاتی پەهلەوی لە سێدارە درا و کۆتایی بە دەسەڵاتی سیاسی کورد دێت.
ڕێژیمی ئاخوندی لە دژوارترین قەیرانی سیاسی و ئابووری و کۆمەڵایەتی و ئاسایشی خۆیدایە و هێزەکانی کوردستانیش بە لەبەرچاو گڕتنی کەش و هەوای سیاسی ئێران و بیری شۆڤێنیستانەی بەشێك لە فارسەکان، لە هەموو وەختێك زیاتر نیازیان بە لێك نزیکبوونەوە و پێکەوەکارکردن هەیە و لە داهاتووشدا دەبێت ئەو ڕێچکەیە بەهێزتر بکرێت و دەفکری نەخشەڕێگای هاوبەشی سیاسی بۆ داهاتووی وڵات دابین و بە خەونی خەیاڵی دووبەرەکی دروستکردن بە هیچ جێگایەك لە تێکۆشان بەدژی ڕێژیمی ئێران ناگەین.
بەڕێزانی کۆمەڵە لانیکەم دەبوو تۆزێك بیر لە لایەنە خراپەکانی ئەو هەڵمەتە بە دژی حیزبی دێمۆکڕات دەستیان پێکردووە بکەنەوە و زیانەکەیانی بۆسەر یەکیەتی و کۆدەنگی نیشتیمانی لێك بدەنەوە و تەنانەت خێر بە خۆشیان ناگەیەنێت.
ئەگەر شەر روویدا، کارێکی خراپە و کورد کوژی دەبێت لە نێو بچێت و بەخەتاو تاوانێکی گەورەی نەتەوەیی سەیربکرێ و ئەو بەڕێزانەی بەو خەیاڵانە دەژین، دەبێت ئەوە باش بزانن کە هاوشێوەی ئێوەمانانێك بوون ئەو کاتیش ئاگری ناکۆکی و شەڕی نێوخۆییان هەڵگریساند و زیانێکی قەرەبوو نەکراوە بە کورد و جووڵانەوەکەی گەیشت و لە ئامانجەکانی دووری خستینەوە.
خەڵکی رۆژهەڵاتی کوردستان و ئەندامان و لایەنگرانی هەردوك هێزی کوردستان لە زۆر بوواردا هاوکاری و یارمەتی یەکدی دەدەن لە نێوخۆی کوردستان.
کەوابوو زەمینەی هەڵدانەوەی لاپەرە ڕەش و ناخۆشەکان دڵی هیچ لایەك خۆش ناکات، جگە لە لەو بەڕێزانەی کە ئەو خەونەی دەبینن.
ئێمە وەك ئەندامان و لایەنگران و دۆستانی حیزبی دێمۆکڕاتی کوردستانی ئێران بە چاوی ڕەخنەگرانەوە دێراسەی وردی رووداوەکانی ڕابروومان کردوە و لەژێر تیشکی رووناکای ئەو هەڵسەنگاندنەشدا، حیزبەکەمان، حیزبی دێمۆکراتی کوردستانی ئیران هەستی بە زەروورەتی مێژوویی هاوپەیمانی سیاسی و هاوکاری لە گەڵ کۆمەڵە و کۆی هێزە سیاسی و تێکۆشەرەکانی دژبەری ڕێژیمی ئاخوندیدا کردوە و بە دڵنیایشەوە هاورێیانی کٶمەڵەش بەو نیەت و تێگەیشتنە سیاسی و کۆمەڵایەتیە پەیوەندییە دوو قۆڵیەکان لە گەڵ حیزب و هێزەکانی تری کوردستان بەهێز دەکەن و بە هەمووشیان دەیپارێزن و ڕیگری لەو گروپەی دەگرن کە خەریکی ئەو کارەن !
ڕەخنەگرتن و ڕوانینی جیاواز دەوڵەمەندی فرە ڕەهەندی سیاسی و کۆمەڵایەتی ژینگەی کوردستان دەگەیەنێ و سروشتی سیاسی و پێکهاتەی حیزب بە جۆرێک ڕەنگ ڕێژکراوە کە ڕێز لە هەر بیر و باوەڕێك بگرێ و خۆی بە دوور بگرێ لە دەمارگرژی و بەکار هێنانی زمانی زبر کە زیان بە کۆدەنگی نەتەوەیی بگەیەنێت.
حیزبی دێمۆکڕات خاوەنی ئیرادە و پێگە و خۆشەویستیە لە نێوخەڵك و بۆ پاراستنی تەبایی و یەکگرتوویی نیوخۆی، لە شەرە دندووکەی ڕێکخراوەی بە تەواوی خۆی دەپارێزی و قەزاوەت و داوەریەکەی دەدەینە دەستی کۆمەڵانی هەراوی خەڵکی کوردستان لە ئەمڕۆی خەباتی نەتەوەییدا.
بێگوومان ئەو بەڕێزانەی کۆمەڵە چاك دەزانن کە ئامانج لەو کارەیان بەداخەوە بەنیەتی خێر نیە و بیرێکی بەتەواوی ناسەلیم و ناتەندروستی سیاسی و کۆمەڵایەتی لە پشتەوەیە و ڕێبەری کۆمەلە نابێت لە ئاستیدا بێ دەنگ بێت و بەرپرسانە هەڵوێست بگرێ.
بە شانازیەوە دەڵێم ئێمە پەروەردەی مەكتەبێکی بە تەواوی سیاسی و نەتەوەیین و وەك تەشکیلاتی حدکا بە تەواوی هەست بە بەرپرسیارەتی سیاسی و نەتەوەیی دەکا و خۆی لە دڕدۆنگی لادەدات و لە سەفی بەهێزکردن و پەرەپێدانی یەکڕیزی سیاسیدا خەبات دەکات و وەك هێزێکی نەتەوەیی هەڵسەنگاندنی رووداوەکانی کوردستان دەکا.
ئەو ژمارەیە لە برایانی کۆمەڵە ئەگەر تۆزێك ویژدانی سیاسی و گەل دۆستی یان هەبووایە و لایەنگری یەکڕیزی سیاسی و کۆدەنگی گەلی کوردیان بە لاوە گرینگ بووایە و بەداخ و ئەسەفەوە سەیری پەیوەندییەکانی رابردووی کوردستانیان بکردایە، هەرگیز بەو جۆرە خۆیان لە قەرەی بەکارهێنانی ئەو جۆرە لە زمانی بزر نەدەدایەوە و بەرەو قووڵ کردنەوەی ناکۆکیەکان نەدەچوون.
فەلسەفەی شەڕ و تێکدانی تەبایی ئەوەیە کە کەسێكی زۆر نەفام و بیرداخراو هەڵی دەگریسێنێ و بە هەزاران مرۆڤی گەورە و بیر هێور و ڕۆشنبیر کۆتایی پێ نایەت، جا باسی کارەسات و گاریگەریەکانی لەسەر ڕەوتی خەبات هەرناکرێت.
حدکا و کۆمەڵە هاوپەیمانەتیەکی سیاسیان لە نیوخۆیاندا پێك هێنا بوو و دیارە ئەو بابەتە هەر بەڕێکەوت و لەخۆوە نەهاتۆتە بەرەوە، بەڵکوو زادەی قووڵبوونەوەیەکی مەسئولانە بووە بۆ داهاتووی کوردستان و پێشگرتن لە بارگرژی و بەر یەککەوتنەوەی ئەو دوو هێزەیە و هەر دووك لاشیان هەستیان بەو مەترسیانە کردوە، کە ڕەنگە چەند کەس و گروپێك بتوانن ئاگری ماڵوێرانکەری شەرێکی دیکەی براکۆژی هەڵبگریسێنەوە.
کوردی ڕۆژهەڵات بە هەموو ڕەهەند و بیر و فیکری سیاسی کە هەیانە، مەحکوومین بە یەکگرتوویی و هاوپەیمانی سیاسی و ستڕاتیژی لە سایەی بەرەیەکی گەورە و فراوانی سیاسی و چەکداریدا بەرامبەر بەڕێژیمی ئاخوندی و بەدی هێنان و پاراستنی دەسکەوتە سیاسی و نەتەوایەتیەکانی کورد .
ئەگەر لە ئێستاوە زەمینەی گونجاو پێك نەیەت و بە یەکەوە کار نەکرێت، جووڵانەوەی سیاسی کورد بۆ جارێکی تر زیانی زۆری بەردەکەوێتەوە. رووداوەکانی باشووری کوردستان ئاوێنەی باڵانوینین بۆ کۆی باروودۆخە سیاسی لە کوردستاندا، چوونکی ئەوان بە هۆی تێکچوونی هاوسەنگی سیاسی و بارگرژی نێوخۆییان دەبینین وەزعیان چۆنە.
محمد سلێمانی
28.03.2024