“ناسکە ساڵە نەوەکا بێنێ برینی تەشەنێ”(٭) قادر وریا

“ناسکە ساڵە نەوەکا بێنێ برینی تەشەنێ”(٭)
قادر وریا ١/٤/٢٠٢٦
ئەم شێعرەی خوارەوەی کاک ئەحمەد قازی لای من لە جوانیدا کەم وێنەیە. داستانی شێعرەکەتان با بە قەڵەمی خودی شاعیر بۆ بگێڕمەوە:
“کوڕی گەورەی کاک مستەفام بە ناوی عەلی پێشمەرگەی حیزب بوو. عەلی لە تەمەنی ١٨ ساڵیدا، لە شەوی چوارشەمە سووریدا و لەو شەوەدا کە شەوی لە دایکبوونی بوو، شەهید کرا. عەلی ئازا و جوان چاک و خۆش هەیکەل و چوارشانە بوو. ئەو کاتە من لە تاران بووم، کە هەواڵی دڵتەزێنی کوژرانی عەلیم پێگەیشت، ماتەم دایگرتم و پەنام بۆ دنیای دەروونی پڕ لە پەژارەی خۆم برد و شێعری ماتەمینی ژێرەوەم بۆ عەلی و شەهیدانی هاوڕێی نووسی”:
هەستە ئەی سروە بڕۆ بێنە هەواڵێکی وەتەن
وەک دەڵێن سوورە بە خوێن کێو و کەژ و دار و دەوەن
وەک دەڵێن مەحشەری کوبڕایە(١) لە دەشتی قەرەداغ
جێی شەهیدانی گەلی کوردە بەهەشتی قەرەداغ
قەرەداغ مەوتەنی شێرانی شەهیدی وەتەنە
جێی سولەیمان و عەلی و یوسف و گڵکۆی حەسەنە(٢)
ئەی شەبەک خۆشی لە تۆ بیکەوە ئەو ئامێزە
تەرمی ئەو لاوە دەباوەش گرە بیپارێزە
چاوی هەر ڕەش بێ هەتا دێمەوە کوڵمی هەر گەش
مار و مێروو، نەیەڵی لەم گوڵە بمکەن بێ بەش
بە تەبیبان بڵێ ئامانە چ دەستی نەکەنێ
ناسکە ساڵە نەوەکا بێنێ برینی تەشەنێ
من بە دەسرەی گوڵە مێلاقە برینی دەسڕم
کفنی سووری لە گوڵی ئاڵی چیا بۆ دەبڕم
گەر چی منداڵ بوو عەلی، سەروەر و سەردارم بوو
مەردی مەیدانی شەڕەف هەڵمەتی چەکدارم بوو
خادیمی ئەو حەرەمەم تا کوو دەژیم تا دەمرم
دەوری ئەم گۆڕە بە پەرژینی هەڵاڵان دەگرم
دەچەقێنم لە سەر ئەم گۆڕە پەلی دارە بەنێ
عاشقان سەر لە عەلی دەن کە غەریبە و بە تەنێ
کەوی سەرمەستی بەهاری لە سەری بخوێنێ
مستەفام بەم قسەیە و قاسپەیە بۆ بدوێنێ
شیوەنی ناوێ شەهید کاکە نەچی بۆی بگری
ڕۆڵەڕۆی ناوی لە تۆ دایە نەچی بۆی بمری
کاری دژوارە دەبێ هەر یەکە لایەک بگرین
نیشتیمان بێ کەسە پێویستە هەموو بۆی بمرین.
(１) کوبڕا: ناوی دایکی ئەم شەهیدەیە کە دەگەڵ مەحشەری کوبڕا، ڕێک دێتەوە.
(２) ناوی چەند کەس لە کورەکانی بنەماڵەی سازواری کە هاوڕێی شەهید عەلی بوون.
(３) شەبەک. ناوی ئەو گۆڕستانەیە کە لە قەرەداغ ئەو شەهیدانەی تێدا نێژراوە.
(٭)لە کتێبی بیرەوەرییەکانی مامۆستای نەمر ئەحمەد قازی، وەرم گرتووە.