mohammad_suleimani.jpgماوەیەکە بەهۆی لایڤەکانی تایبەت بەشەری نێوخۆی حیزبی دێمۆکراتی کوردستانی ئیران و کۆمەڵەی زەحمەتکێشانی کوردستانی ئێران کە بەڕێز بەختیار بلووری ئەمجامیداون،

بۆتە مایەی سەر ئێشە و دڵەڕاوکەی زۆری بۆ تێکۆشەرانی ئەو دوو هێزە و کۆمەڵانی خەڵکی کوردستان و دڵسۆزانی یەکیەتی سیاسی و نەتەوەیی لە ڕۆژهەڵاتی کوردستاندا بەدوایخۆیدا هێناوە و، بەوپەڕی پێناخۆشبوونەوە دەڕوانە هەوڵێکی گووماناوی لەو چەشنەی بلووری و بلووریەکان ، کە بەداخەوە بۆ کەس روونیە ئامانجی لەوکارە چیە و بەوکردەوەیان هەوڵی بەدەست هێنانی چیدەدەن. لە کاتێكدا ڕێژیمی تاران لە داڕمان و داڕوووخانی نزیکتر بۆتەوە و هەلومەرجێکی نوێ لە بەرژەوەندی شۆڕشی کوردستاندا هاتۆتە ئاراوە و دەرفەتێكە کە کورد لازمە سوودی باشی لێوەربگرێ و نێوماڵی خۆی ڕێکبخات. حیزبی دێمۆکڕات و کۆمەڵەش بە هەستکردن بەبەرپرسیارەتی سیاسی و نەتەوەیی لەو بەشەی کوردستاندا، بۆ چەند ساڵێك دەبێت هاوپەیمانەتیەکی سیاسی و ستڕاتیژیان بە یەکەوە واژۆکردوە بۆ ئەوەی پێش بەئەگەری بەریەكکەوتنەوە بگرن لە داهاتووی سیاسی کوردستاندا. بەرێز بلووریش بەو کارەی جگە لە خوێ کردنەوە ناوبرینەکان و قووڵترکردنەوەی ناکۆکیە سیاسی و کۆمەڵایەتیەکان، بەداخەوە هیچ بەرهەمێکی تری لە بەڕێوەبردنی لایڤەکانیدا پێنابرێت. دەبوو ئەو بەرێزە لەجیاتی ئەو کارەی ئەمجامی دەدات، وەك مرۆڤێکی کوردپەروەر بەدەم رووداوەکاندا چووبا و لە سەر بەهێزکردنی بیری نەتەوەیی و کۆدەنگی سیاسی و نیشتیمانی لایڤی بەڕێوەبردبا و ڕێگای دیالۆگی شارستانی و تەبای سیاسی کرابا بە هەوێن و نێوئاخنی بەرنامەکەی و ڕێگای بەکەس یان کەسانیك نەدابا، تۆی دووبەرەکی و بارگرژی بچیننەوە. جووڵانەوەی سیاسی کورد کاتێك بە ئامانجەکانی دەگات کە یەکگرتووی سیاسی و ئاشتی کۆمەڵایەتی لە ڕۆژهەڵاتی کوردستاندا بەهێزبکرێت و بەهەموو لایەکیش ئەو برایەتیە لە نێوان هیزەکاندا بپارێزین. شەڕ کردارێکی نەفرەت لێکراوە و ئەگەر قەراربێت دژی بین و زەمینەی دووبارەبوونەوەی بۆ نەرەخسینینەوە، لانیکەم دەبوو بلووریش پابەندی پاراستنی یەکیەتی سیاسی و کۆدەنگی نەتەوەیی کوردستان بێ و لایڤەکانی و نێوەڕۆکی بەرنامەکانی لە ڕاستای بە هێزکردنی ئاشتی کۆمەڵایەتی و گەشەپێدان بە بیری نەتەوەیی و هاوکاری لە نێوان کۆمەڵە و حیزبدا بوایە، نەوەك بەو بەرنامەیەی دەستیپێکردوە، هەوڵی کۆکردنەوەی بیری توند ئاژۆکان بدات و رەوتی سیاسی و تەبای لە باربەرێت. ڕێژیمی ئاخوندی لە دژوارترین قەیرانی سیاسی و ئابووری و کۆمەڵایەتی و ئاسایشی خۆیدایە و هێزەکانی کوردستانیش بەلەبەرچاوگڕتنی کەش و هەوای سیاسی ئێران و بیری شۆڤێنیستانەی بەشێك لە فارسەکان، لە هەموو وەختێك زیاتر نیازیان بە لێك نزیکبوونەوە و پێکەوەکارکردن هەیە و لە داهاتووشدا دەبێت ئەو ڕێچکەیە بەهێزتر بکرێت و نەخشەڕێگای هاوبەشی سیاسی بۆ داهاتووی وڵات دابنێن. بەڕێز بەختیار لانیکەم دەبوو تۆزێك بیری لە لایەنە باش و خراپەکەی ئەو کارەی پێی هەستاوەکردبایەوە و زیانە کیانی لەسەر ئاستی ڕۆژهەڵاتی کوردستاندا لە بەرچاو گرتبا. ئەگەر شەر روویدا، کارێکی خراپە و کورد کوژی دەبێت لە نێو بچێت و بەخەتاو تاوانێکی گەورەی نەتەوەیی سەیربکرێ و، بلووری بەرێزیش دەبێت ئەوەباش بزانێت کە هاوشێوەی ئێوەمانانێك بوون ئەو کاتیش ئاگری ئەو شەرەیان هەڵگریساند و زیانێکی قەرەبوو نەکراوە بە کورد و جووڵانەوەکەی گەیشت. رووی قسەم دەکەمە تێکۆشەرانی ئازایخوازی حیزبی دێمۆکڕات و کۆمەڵە کە هەموومان دەبێت لە سەنگرێكدا خەبات بکەین، کە دژی حکوومەتی ئاخوندیە و نابێت بۆ جارێکیتر لوولەی چەکەکانمان بەرەو رووی یەکدی بکەینەوە و سێرە لە خۆمان بگرین. خەڵکی رۆژهەڵاتی کوردستان و ئەندامان و لایەنگرانی هەردووك هێزی کوردستان لە زۆر بوواردا هاوکاری و یارمەتی یەکدی دەدەن. کەوابوو زەمینەی ‌ هەڵدانەوەی لاپەرە ڕەش و ناخۆشەکان دڵی هیچ لایەك خۆش ناکات، جگە لە بلووری خۆی و گروپێك کە لە ژێر پەردەی ڕەشی گوماناویدا، هەوڵی تێکدانی یەکڕیزی حیزب و کۆمەڵەیان دەستپێکردوە و هەوڵێ شێواندن و بەلاڕێدا بردنی کۆی رووداوە سیاسی و مێژوویەکانی ڕۆژهەڵات دەدەن. ئێمە وەك ئەندامان و لایەنگران و دۆستانی حیزبی دێمۆکڕاتی کوردستانی ئێران بەچاوی ڕەخنەگرانەوە دێراسەی وردی رووداوەکانی ڕابروومانکردوە و لەژێر تیشکی رووناکای ئەو هەڵسەنگاندنەشدا، حیزبەکەمان، حیزبی دێمۆکراتی کوردستانی ئیران هەستی بە زەروورەتی مێژووی هاوپەیمانی سیاسی و ستڕاتیژی لە گەڵ کۆمەڵە و کۆی هێزە سیاسی و تێکۆشەرەکانی دژبەری ڕێژیمی ئاخوندیدا کردوە و، بە دڵنیایشەوە هاورێیانی کٶمەڵەش بەو نیەت و تێگەیشتنە سیاسی و کۆمەڵایەتیە پەیوەندیە دوو قۆڵیەکان لە گەڵ حیزب و هێزەکانی تری کوردستان بەهێزدەکەن و بە هەمووشیان دەیپارێزن ! زۆر ڕاشکاوبین بەیەکەوە، سەبارەت بە رووداوەکانی کە بەسەر حیزبەکاندا هاتوون، بە خۆش یان ناخۆشەوە، تازە بۆمان ناگەڕێتەوە، بەڵام دەکرێت هەموو لایەك لەسەر ئەوە کاربکەین کە چۆن هەستی هاوکاری و فرە ڕەهەندی سیاسی و بیرکردنەوەی جیاواز دەرفەتی گەشەکردن و پێشکەوتنی بۆ بڕەخسێت لە داهاتووی سیاسی کوردستاندا و زەمینەی پێکەوە هەڵکردن و هاوکاری کردن بەهێز و بەهێزتر بکرێت. دڵنیام بلووریش چاك دەزانێت بە هەڵدانەوەی لاپەرەکانی ڕابروو، ئەوەیش بە دەمارگژیەوە، هەوێنی چارەسەرکردنی کێشەکان نیە و بگرە لەو رێگایەوە هەوڵی شێواندانی مێژووی رووداوەکانی لە هەگبەیدایە. کام لایەن هۆکاربووە و زیاتر هۆکاری ئەو شەرە نگریس و ماڵوێرانکەریەبووە، هیچ لە جەوهەر و بابەتی مەسەلەکەی ناگۆڕیت و نە قوربانیەکان زیندوو دەبنەوە و نە دەسکەوتە لە دەستچووەکانیش تازە دەگەڕێنەوە. بەڵکوو ئەو رووداوە دەبێت وەك دەست مایە و وەرچەرخانێکی مێژووی لە پەیوەندی لە گەڵ کاریهاوبەشدا تاوتوێبکرێت. بێگوومان خۆیشی چاك دەزانێت کە ئامانج لەو کارەی خێر نیە و بیرێکی بەتەواوی ناسەلیم و ناتەندروستی سیاسی و کۆمەڵایەتی لە پشتەوەیە. بۆ هەموولایەك دەرکەوتووە ئامانجی ئەو بەرێزە ئەوەیە کە" توندئاژووکانی حیکمەت نیزم کە گڕکانی شەرەکەش لە تەپۆڵکەی فیکری ئەواندا گەشەیکردبوو" ، بۆ جارێکتر تینوێتی خۆیان بە خوێنی خۆکوژی و شەڕی براکۆژی بشکێنەوە. ئەگینا بلووریش دەبوو لە سەفی بەهێزکردن و پەرەپێدانی یەکڕیزی سیاسی و نەتەوەیدا خۆی ڕێکخستبا و وەك مرۆڤێکی نەتەوەیی هەڵسەنگاندنی رووداوەکانی کردبا و کێوماڵی مێژووی رابردووی بە ئاقارە وشکانیەکاندا نەبردبا و ڕێچکەیەکی خواری هەڵنەبژاردبایەوە.
بەخۆشیەوە تێکۆشەرانی حیزب و هاوڕێانی کۆمەڵەیش لەو بارەوە بەدادوەرییەوە لێكدانەوە و تێڕامانی خۆیان لە بابەت ئەو خاڵە و کۆمێنت و سەرنجەکاندا خستۆتەروو کە ، ئاوێزانی تۆڕەکۆمەڵایەتیەکانکردەوە بە مەبەستی هێوەرکردنەوەی بارودۆخەکە و قسەی هەموویان جگە لە، کۆمەڵێك دژ بەری یەکڕیزی سیاسی بزووتنەوەی شۆڕشگێڕی لە رۆژهەڵاتی کوردستاندا نەبێت، بەگشتی لایەنگری پاراستن و گەشەپێدانی هاوکاری و هاوپەیمانی حیزب و کۆمەڵە و هێزە تێکۆشەرەکانی دیکەی کوردستان دەکەن کە دژی حکوومەتی ئاخوندی ئێران لە حاڵی بەرخۆدانی نەتەوەیدان. بەڵام پرسیار لە بەرێز بلووری و هاوبیرەکانی ئەوەیە ئەگەر پێتوایە شەر شتێکی خراپە و کورد دەبێت خۆی لێبەدووربگرێ و بۆ هەمیشە نەفرەت لەو کردارەبکرێت، چۆنە و بۆچی راست لە ئێستادا ئەو لاپەڕەیەتانکردۆتەوە ؟ یان بەوکارەت جگە لە بارگژی و دڵ ئێشەی کۆمەڵایەتی چیترتان دەست دەکەوێت؟ یان ئەوەتا لە شوێنێکی نادیار و دژی بەرژەوەندی نەتەوەی و یەکیەتی سیاسی کورد، دەستیان لە پشتداوی و ئیزنی ئەو کارەت وەرگرتووە؟
بەڕێز بەختیار ئەگەر تۆزێك ویژدانی سیاسی و گەلدۆستی هەبووایە و لایەنگری یەکڕیزی سیاسی و کۆدەنگی گەلی کوردی ویستبایە و بە داخ و ئەسەفەوە سەیری لاپەڕەکانی شەری نێوخۆی حیزبی دێمۆکڕاتی کوردستانی ئێران و کۆمەڵەی زەحمەتکێشانی شۆڕشگێڕی کوردستانی ئێران کردبا،لانیکەم لە باروودۆخی سیاسی ئەمڕۆدا ئەو بابەتەیان بە ڕۆژەڤ نەدەکردەوە و لایڤی بۆ ڕێك نەدەخست. ئەو بەڕێزە بە دڵنیایەوە بە ئانقەست و بە مەبەستی دیاریکراو بەو کارەی هەستاوە و هەوڵی بارگرژی سیاسی و کۆمەڵایەتی لە کوردستان دەدات. ئەو دوو هێزەی کوردستان بە تێڕامان و وردبوونەوە بە ڕابردووی پەیوەندیەکانیاندا و بە ئەزموون وەرگرتن لە ڕابردووی سیاسی و چەکداریان بەو ئاکامەی گەیشتوون کە ئەگەر کۆك و تەبا و پێکەوە لەسەنگەرێكدا خەبات نەکەن،بە سانای بەئامانجەکانی خەباتی ڕزگاریخوازی ناگەن و کۆمەڵێك کاڵفام و توند ئاژۆی نێوخۆیەوە، بەگژیەکدا بکرێینەوە. شەر کەسێكی زۆر نەفام و بیرداخراو هەڵیدەگریسێنێ و بە هەزاران مرۆڤی گەورە و بیر هێور و ڕۆشنبیر کۆتای پێنایەت. هاوپەیمانەتی سیاسی کۆمەڵە و حیزب بەرئەنجامی خوێندنەوەی ورد و ژیرانەیە کە ڕوانینێکی مۆدێڕن و یەکگرتووی سیاسی بەرهەم هێناوە لە ڕۆژهەڵاتی کوردستان و بە کس یان گرووپێکی نەخوازراوە لێك ناترازێ . پاشان ئەو هاوپەیمانەتیە سیاسی و مێژوویە هەر بەڕێکەوت و لەخۆوە نەهاتۆتە بەرەوە، بەڵکوو زادەی قووڵبوونەوەیەکی مەسئولانە بووە بۆ داهاتووی کوردستان و پێشگرتن لە بارگرژی و بەریەککەوتنەوەی ئەو دوو هێزەیە و هەر دووك لاشیان هەستیان بەو مەترسیانە کردوە، کە ڕەنگە چەند کەس و گروپ بتوانن ئاگری ماڵوێرانکەری شەرێکی دیکەی براکۆژی هەڵبگریسێنەوە. زۆر لە پێشمەرگەکانی کۆمەڵەش کە قسەیان لەسەر رووداوەکان کردوە لە حزوری لایڤەکەی بلووریدا، بەشێکیان زۆر دادپەروەرانە باسی بابەتەکەیانکردوە و بەقسەی ئەوانیش دەردەکەوێت کە حیزبی دێمۆکرات و ڕێبەری مێژووێ هاوچەرخی نوێی شۆڕشی کوردستان، شەهید دکتۆر قاسملوو میحوەری ئەو ناکۆکیە سیاسی و بەریەککەوتنە و، هۆکاری ئەو شەڕە نەبووە. لە زۆربەی میحوەرەکاندا حیزب زیانی بەرکەوتوو و، پاشان بڕیاری بەرگریکردن دراوە. زۆر جێگای داخە کە مرۆڤ گەلێكی دژی بەری یەکڕیزی و کۆدەنگی سیاسی لە ئەمڕۆدا بە بابەتێك هەستن کە نە ڕۆژیەتی و نە بۆباسکردن و لایڤ پێك هێنان دەبێت. ئەو هەنگاوە بەداخەوە گەلێك مەترسیدارە و هەلەوکاتەشدا بەتەواوی گوماناوییەو لە ژێر پەردەی ڕەشی پیلان گێڕیەکی ترسەناکدا، هەوڵدەدرێت درز بخرێتەوە نێوان هاوپەیمانی حدکا و کۆمەڵە لە سەر ئاستی کوردستاندا. بلووری بێگوومان دژی بەهێزبوون و پەرەگرتنی بزوتنەوەی سیاسی و نەتەوایەتیە لە ڕۆژهەڵاتی کوردستاندا، هەر لەبەر ئەوەش بەو کارەی هەستاوە هەتا لانیکەم بە دڵی نەیارانی کورد هەنگاوێکی هەڵگربێت و دڵی خۆی و هی ئەوانیش ئاو بخواتەوە. چوونکی ئەگەر تۆزێك بیر بکاتەوە و ویژدانی خۆی لەو بارەوە بکاتە دادوەر و بەدوور لە دەمارگرژی بڕوانێتە ئاکامی کارەکەی، ڕەنگە هێندێك لەناسەلیمی کارەکەی خۆی بگات و بزانێت بە قازانجی بزووتنەوەی سەربەخۆی خوازی کوردستاندانیە. کوردی ڕۆژهەڵات بە هەموو ڕەهەند و بیر و فیکری سیاسی کە هەیە، مەحکوومین بە یەکگرتووی و هاوپەیمانی سیاسی و ستڕاتیژی لە سایەی بەرەیەکی گەورەو فراوانی سیاسی و چەکداریدا بەرامبەر بەڕێژیمی ئاخوندی و بەدی هێنان و پاراستنی دەسکەوتە سیاسی و نەتەوایەتیەکانی کورد . ئەگەر لە ئێستاوە زەمینەی گونجاو پێك نەیەت و بە یەکەوە کار نەکرێت، جووڵانەوەی سیاسی کورد بۆ جارێکی تر زیانی زۆری بەردەکەوێتەوە. رووداوەکانی باشووری کوردستان ئاوێنەی باڵانوینین بۆ کۆی باروودۆخە سیاسی لە کوردستاندا، چوونکی ئەوان بە هۆی تێکچوونی هاوسەنگی سیاسی و بارگرژی نێوخۆی دیتمان چیان بەسەرداهات.
محەممەد سلێمانی
05.11.2018

شەهید پێشەوا قازی محەممەد

شەهید پێشەوا قازی محەممەد
سەرۆک کۆماری کوردستان شەهید پێشەوا قازی محەممەد