armi_xwendkaran.jpgخەڵکی تێکۆشەرو شۆڕشگێڕی کوردستان، ئەندامان‌و لایەنگرانی حیزبی دێموکڕاتی کوردستان، بنەماڵەی دەروەستی شەهیدانی جووڵانەوەی نەتەوەیی دێموکڕاتیک‌و

عەداڵەتخوازی کوردستان، ئەندامان‌و لایەنگرانی یەکیەتیی نەتەوەیی خوێندکارانی کورد:
درێژە پێدان بەو باوەڕەی ژێ_کاف‌ی ئافراندو حیزبی دێموکڕاتی کوردستانی لەسەر بنچینە هزرییەکانی ئاوا کرد خوێندکارانی میراتگری سوێندی وەفا بە کۆمارو خاکی وڵاتی هاندا بۆ ئەوەی لێرەوە لە هەڵگوردی شوناسی شۆڕشی نوێمانەوە پەیامی پیرۆزبایی ٧٣ ساڵەی دامەزراندنی کۆماری کوردستان ئاوێتەی ڕووحی خاکی پۆشانی دێموکڕات‌و سەرکەشی غرووری هەڵگوردئاسای پێشمەرگەکانی هاواڵی بەفرو کڕێوەی مەڵبەندی شۆڕشی نوێ‌و عەوداڵی پیرۆزترین وشەی دنیا واتا ئازادی بکەین‌و لێرەوە یادکەین لە یەکەمین‌و دێموکڕاتیک‌ترین ئەزموونی دەسەڵاتدارێتی مۆدێڕن لە ڕۆژهەڵاتی ناوەڕاست.
٢ی ڕێبەندان لە ئێوە زەبیحی‌و قزڵجییەکانی سەردەم، لە هێمنەکانی ڕۆژو یارانی بەوەفای هاواری نیشتمان، لە ئێوە ئەوانەی خەونی شڵەقاندنێکی یەکجاریی ئەو دەسەڵاتە دیکتاتۆڕە بۆتە بە مەلەکەی زەینتان‌و بە ڕووحی پێشەنگی شەریفزادەو موعینی‌و مەلائاوارەوە ئەوین بە خاک ئاوێتەی ئیلاهیترین ڕوانینەکان دەکەن پیرٶز بێ.
٢ی ڕێبەندان‌و کۆماری کوردستان سەلمێنەری ئەو ڕاستییە لە زاری دوژمن تاڵەن کە کورد وەک خاوەنی یەکەمین سیستەمی دێموکڕاتیک‌و سۆسیالیستی مێژوو و هەڵگرانی سەرەتایی‌ترین بایەخە پیرۆزەکانی شۆڕشی کشتوکاڵ‌و ژیانی دێموکڕاتیک‌و کۆمەڵگاو بنەماڵەی دێموکڕاتیک مێژوو دووپات کردنەوە هەر لە خۆیان دەوەشێتەوەو ئەگەر جوغڕافیای ڕٶژهەڵاتی ناوەڕاست ئێستاش ئینسان بوونی تێدا نەمردووەو ڕێزگرتن لە کەرامەتی مرۆڤ بە لووتکەی ئەخلاقی کۆمەڵایەتی چاوی لێدەکرێ بێگومان ئەوە باوەڕێکی هەڵقوڵاوی ناخی کلتووری کۆمەڵگای کوردەوارییە.
گەلی کوردو ئەوانەی کۆماری کوردستانیان لە ئێرانی ساڵەکانی ٢٤و٢٥دا تێئۆریزە کرد کەماڵی دێموکڕاتیک بوونی کلتووری سیاسی کوردستانیان نیشانی دنیای بە قەول مۆدێڕن‌و هێزە شبهە ئازادیخوازو چەپە کلاسیکییەکانداو فەرمانی ئیرادەی گەل‌سەروەرەیان بە پڕاتیک بە دۆست‌و دوژمن سەلماند.
کۆماری کوردستان بوو بە هەوێنی ئەو ڕاستییە جەوهەرینەی کە کوردستان ناتوانێ لانکی ئیرتجاع‌و دواکەوتوویی بێ، لە کوردستانی ئێمە قازی عەدل مامۆستای ئایینی‌و گوندی‌و شاری کورد لە چوارچێوەی فۆڕماسیۆنێکی بیرکردنەوەی لیپاولیپ لە پێکەوە ژیانی نەتەوەیی‌و قەبووڵ کردنی جیاوازی‌و چەندایەتی‌و چەند ڕەنگیدا دەچنە نێو پڕۆسەی مێژووی سیاسی دنیاو هیچ شتێک بەقەد ئەندێشەی دێموکڕاتیک لە لای ئەوان شیرین نییە.
پیاو سالاری وەک زێهنییەتێکی مێژوویی گورزێکی گرانی وێدەکەوێ‌و ژنان بەشداری پڕۆسەی سیاسی دەبن‌و ئیدی سیاسەت لە مالکییەتی نێرینەدا نامێنێ. ئەشڕاف‌و فێئۆداڵە خۆفرۆش‌و ئاغا خۆپەرستەکان ترسی ڕمانی کۆشکە بە خیانەت سازکراوەکانیان لێدەنیشێ‌و کوردبوونی ڕاست ئەگەر بە زەبری هێزیش بێ وەک ئەمری واقع بەسەریاندا دەسەپێ. خوێندکاری کورد بوورسی خوێندن وەردەگرێ‌و ڕەوانەی زانکۆی وڵاتانی خاریجی دەکرێت‌و زانست‌و خۆ تەیار کردن بە چەکی مەعریفە دەبێتە بە یەکێک لە گەورەترین خۆزیاکانی بەڕێوەبەرانی کۆمار.
پاراستن لە چوارچێوەی ڕووانینی لیبڕالیزمدا قەتیس نامێنێ‌و ژن‌و پیاوو بەساڵاچووی کورد پارێزوانی لە کۆمارو شار دەکەن. بەندیخانە تڕۆ دەکرێ‌و مرۆڤ بە شایانی ئازادی ڕەها دادەنرێ، شاعیرو نووسەر قەدریان دەگیرێ‌و بازاڕ بەرەکەتی تێدەکەوێ‌و فەزایەکی ئیدەئالی سیاسی لە کوردستان دێتە ئارا.
لێ مخابن هێڵی خیانەت بە شاراوەیی لە بەرابەر هێڵی بەرخۆدانی نەتەوەیی دەکەوێتە تەڤگەرو هەڵسووڕان‌و پێش ئەوەی دوژمنانی کۆمارو ئاڵاهەڵگرانی ژینووساید، حەزی پێشەوا بخینکێنن جارێکی دیکە ژێرپێی سەرکەردەی شۆڕش‌و شۆڕش خاڵی دەکەن‌و دەبنە یارانی مووسا. ئەوجار مووسای کوردان بێجگە لەوەی بە گیانی خۆی پێش بە کوشتاری خەڵکەکەی بگرێ، ڕێگایەکی دیکە لە پێش خۆی نابینێ!.
خوێندکارانی ئازادیخواز، پێشمەرگە خوێندکارەکانی شۆڕش بە درێژایی ئەو مێژوویە بینیمان چۆن نەتەوە خوازی‌و جمهوورییەت‌و دێموکڕاسی بوونە بە ئاڕمانەکانی پێشەواو حیزبی دێموکڕاتی کوردستان‌و لە ١١ مانگدا هەوڵی نەهادینە کردنیان لە نێو کۆمەڵگادا درا، ئەو هەوڵانە لە دوای تێکچوونی کۆمارەوەو تا ئێستاش هەر بەردەوامن‌و ئێمەی مەحکووم بە وەدی هێنانی خەونەکانی پێشەوا، ئێمەی پێشمەرگەکانی ڕێبازی قاسملوو و شەڕەفکەندی سەنگەری شەهادەتی شەهیدانی ڕێگای سەربەستی کوردستانمان ئاوەدان ڕاگرتووە لە هەمانکاتدا ئەوەشمان لەبەر چاوە، هێڵی خیانەت لە کوردستان هەر بەردەوامەو پڕۆژەی لە کەرامەت ششتنەوەی تاکی کورد واتا جاشایەتی‌و خیانەت هەروا درێژەی هەیەو پیلانی لەنێو بردنمان لە دەستووری کاری ژوورەکانی ئیتلاعات نەچۆتە دەر، بێ وەڵام نابین.
ئێمە لێرە لە چیاکانی کوردستان وەبیر دەسەڵاتی تاران دەهێنینەوە هەر دوێنی بوو لە بۆکان هاواری "قاسملوو، قاسملوو ڕێگات درێژەی هەیە" بوو بە شووعاری خۆپێشاندەران، ئێمە دوای ئەو جێژنەو هەتا ڕێبەندانی داهاتوو ئاستی تێکۆشانمان بەرز دەکەینەوەو سەرهەڵدانەکانی ئەو دواییانەی گەلانی ئێران بۆ لەنێو بردنی دیکتاتۆڕی مەزهەبی‌و فاشێزمی فارس دەکەین بە ڕووحی جەسارەتی زێدەترو دڵنیابن سەرکەوتن بەشی ئازادی‌و شکان هەر نسیبی ملهووڕییە.
خوێندکارانی کورد لە گرتووخانە بکوژن، ژنە چالاکی کورد دەسبەسەر بکەن، ئەدی پێمان ناڵێن لەگەڵ شەونووسینی مەرگ بەر دیکتاتۆڕی کچانی سەرشەقام‌و سووتاندنی بنکەکانی بەسیجتان چ دەکەن؟ وەبیرتان دێنینەوە د. قاسملوو بە کریس کۆچێرای کۆچکردوو دەبێژێ: هەزاری دیکەشمان لێ شەهید بکەن‌و گرتووخانە جێگای ئازادیخوازی کوردو گەلانی ئێران نەبێتەوە سەرکەوتن بۆ ئێمە کوردە نامووسییەو هیچ حیسێبێک بۆ سیستەمی شەڕی تایبەت‌و پڕۆژەی تێڕۆڕو ئاسێمیلاسێۆنیان ناکەین. "ئێمە فرچکمان بە نرخی ئازادی گرتووە چوونکە قاسملوو ئاوای فێرکردووین".
هاوڕێیانی هێژا، لەو ڕۆژە پیرۆزەدا کە ئێمە یادی جێژنی دووی ڕێبەندان دەکەینەوەو لە چوارچێوەی بەهێزکردنی کوردۆلۆژی کوردیداو لە بەرامبەر سستکردنی هێڵی دابڕانی نەتەوەیی‌و لەتوکووت کردنی زەینییەتی شووناس‌خوازی کورد کە داگیرکەران لە ڕێگەی شەڕی تایبەت، دیپلۆماسی‌و گرێدراوکردنی خەباتی کورد لە بەشە جۆراوجۆرەکانی کوردستانەوە بەخۆیان هەوڵی بۆ دەدەن، ئێمەی خوێندکارانی دێموکڕات‌و قوتابخانەت پێشەوا قازی ڕێز دەگرین لە بەرخۆدانی گەلی ڕۆژاوای کوردستان‌و عەفرینی زەیتوونی دەستەخوشکەی ڕۆژهەڵاتی بەڕوو کە بە پشت بەستن بە ئیرادەی خۆیان خەریکی ململانێ‌و خەباتێکی خوێناوی لە بەرامبەر دەستەبرا دیکتاتۆڕو فاشیستە بیر سەفەویستەکانی تاران واتا نێئۆ عوسمانییە فاشیستەکان‌و ڕاسیزمی دینی "ئاکەپە" دەبنەوە ڕایدەگەیەنین گەلی کوردستان ئیدی بڕیاری یەکجاریی بۆ ڕزگاری‌و سەربەستی داوەو " ئێف ١٦"و ڕەشەکوژی زۆر لەوەی چووکەترن ئازادی‌و ڕزگاری لە گەلی کورد بستێننەوە.
لە کۆتاییدا جاڕیکی دیکەش سڵاو لە یادی ٢ڕێبەندان‌و حیزبی دێموکڕاتی کوردستان‌و پێشەوای یەکەم ڕێبەری سیاسی، یەکەم کۆماری کوردستان پێشەوا قازی محەممەد.
سەر کەوێ خەباتی ڕەوای گەلی کورد لە ڕۆژهەڵاتی کوردستان، بە ڕێبەری حیزبی دێموکڕات؛ بڕووخێ فاشیزم‌و سڵاو لە بەرخۆدانی گەلی عەفرین‌و هەموو گەلی ڕٶژاوای کوردستان

شەهید پێشەوا قازی محەممەد

سەرۆک کۆماری کوردستان شەهید پێشەوا قازی محەممەد

حەوتوویەک