aziz_shexani.jpgبنەماڵە و ئازیزانی کاک ئەبوبەکر سەرەخۆشیتان لێدەکەم و لەو کۆچەدا هاوبەشی خەمتانین.  ماڵئاواییەکانی ئێمەی کورد لە غوربەتدا جیاوازن و ژانی تایبەت بە

خۆیان هەیە. ئێمە لە رۆژهەڵاتی کوردستان یەکەمین نەوەیین، کە لە مێژووی هاوچەرخدا بۆ ماوەیەکی دوور و درێژ لە ژینگە و خەڵکەکەمان دادەبڕین. راد و زۆر هاونیشتمانی دیکە نموونەیەکی زیندوو لە بارودۆخی کوردەکانن. رێژەیەک لە بنەماڵەکان کە بنەماڵەی قازی عەلی یەکێک لەوانە لە سەر بناخەی هەڵوێستی کوردانە و ئازایانە لە ژیانی ئاسایی هەڵقەندراون و کەوتوونەتە ژێر پاڵەپەستۆ. ژیان هەڵوێستە و لە گۆڕەپانی خەباتی رزگاریخوانەدا هەڵوێست لوتکەی دەربڕینە. بنەماڵەی راد لەو مەیدانەدا دیارن و ئەرکی خۆیان بە زیادەوە جێبەجێکردوە.  وشەکان لە بەرامبەر زۆر دیاردە و رووداودا کولن. ئەوان ناتوانن وێنەی خەم و ئازاری کۆچی ئازیزان بە شێوازێکی کۆنکرێت دەرببڕن.  بۆیە لێرەدا بە خوێندنەوەی ئەو نووسراوەیە تێکەڵ بە خەمی ئەم کۆچە دەبم.

 سەمفۆنیای ژیان

 - لە نەبوونەوە دێین و تێکەڵ بە رایەڵکەی  بوون دەبین

 وەرزەکان تێپەڕدەکەین

سەرئەنجام، یەکە یەکە لەو کاروانە

 دەڕۆینەدەر و ئۆغر دەکەین

- لە هەناوی رەشەشەو و رۆژە رووناکەکاندا

لە باوەشی سارد و گەرمییەکانی رۆژگاردا

دەخارێین و بەرەو رۆژانی کۆچ

هەنگاو هەڵدەگرین

- لێرە، خەم و شادییەکان

کەوتن و هەستانەوەکان

 داری ژیانمان دەڕەنگێنن

روخسار و تێروانیمان دەخەمڵێنن

- کاروانی ژیان دەڕوا و رەنگ دەگۆڕێ

ریزە چۆڵبوەکان پڕدەبنەوە

 دڵی تازە لێدەدەن و

 روخساری نوێ دەردەکەون

- ئێمە لێرە،لە نیشتمانی دایک یان غوربەتدا

 گەڕیدەیەکی چاوەڕوانین

  بە سەر سینگی گۆی زەویدا رادەبڕین و

 وەرزەکانی تەمەن تێپەڕ دەکەین

 - لێرە لە سەر گۆی زەوی

بۆ  رزگاربوون لە تانوپۆی ژیان و مردن

پەنا بۆ قەڵای خەونەکان دەبەین

ئەو خەونانەی کە هەتا مردن لە گەڵمانن

- لە پێناوی ئامانجەکانماندا

نیشتمان بە غوربەت دەگۆڕینەوە

دژ بە یاسای چەوسانەوە دەوەستینەوە و

ژیان بە مردن دەسپێرین

- لێرە سێ تەوەر و سێ وشەی

 هاتن، گەڕان و چوون

کۆبەندی هزر و تێڕوانینمان دەخوڵقێنن

روخساری راستەقینەی حەقیقەت دەڕەنگێنن

- هاتن، هاتنێکی پڕ بە ئازاڕ، بەڵام پڕ لە بزەی شادیی

گەڕان، گەڕانێکی پڕ لە چەرمەسەریی و خۆشی

کۆچ، چوون و کۆچێکی بێدەنگ

پڕ لە شەپۆلەکانی چاوەڕوانی، گومان و پرسیار

- لێرە، ئێمە گەڕیدەیەکی چاوەڕوانین

گەڕیدەیەکی پڕ لە ژان و ژینین

لە هەناوی قۆناخی هاتن و کۆچدا

سڕ و دەستەوەستانین

- بۆ ساغبوونەوە وێڵی هزرە جیاوازەکانین و

شاڕێ و کوێرەرێگاکانی گەیشتن بە ئامانج

کە ئاوێتەی هاتن، گەڕان و کۆچی یەکجارەکیمانە

بە هەموو هێزەوە دەپێوین

- ژیان لێرە لە ئامێزی نیشتمانی دایک و غوربەتدا

لێواولێوە لە خەونی مانەوە،گەڕانەوە و نەڕۆیشتن

ژیان لێرە پڕاوپڕە

abo_rad.jpgلە  ترسی رۆیشتن، نەگەڕانەوە و  مژاویبوون رێگا و ئامانج

- ئێمە بە رێچکە و  هەناوی هزرێکی مژاویدا

 تێکەڵ بە شەپۆلەکانی ژیان دەبین

لە ناخی گەڕانێکی تەژی لە ئالەنگاری

 بەرەو لێواری کۆچ شۆڕ دەبینەوە

- لە هەناسە دەکەوین و 

دەکەوینە باوەشی نهێنیەکی گەورە

نهێنییەک، کە بێدەنگیی و سڕ دەخوڵقێنێ و

هاتن و ژیان دەتاسێنێ

- لێرە وشەکان بڕناکەن

بیرۆکەکان لاق ناگرن

تاقیکارییەکان سەرناگرن

ئێرە قۆناخی کۆچی راستەقینەیە

-  کۆچێک، کە هیچ سنوورێک ناناسێت

نیشتمان و غوربەت تێدەپەڕێنێ و

تەنیا لە گەڵ بێدەنگی

 هاوڕەنگ و هاوتایە

-ئێرە لێڕەواڕی چڕی هزر و بیری دیلکراوە

لێرە، ماڵئاوایی یەکجاری دوا هەناسەی شمشاڵی ژیانە

چاوەکان لەهێز دەکەون

 و زمان لە گەڕان دەوەستێ

- ئێرە کۆتایی قۆناخێک و

سەرەتای وەرزێکی دیکەیە

گۆڕەپانی سەرکەوتنی وەستان و

 تەواوبوونی زەمەنە

-  چاوەڕوانییەکانی ئێمە بە داهاتوو دەسپێرێ

لە دواڕۆژ نادڵنیاترمان دەکات

پرسیارە ئەستەمەکان دەورووژێنێ  و

بازنەی لێکدانەوەکانمان تەماویتر دەکات

- لێرە سەمفۆنیای ژیان

پڕ بە دەنگی هاتن و هاواری گەڕان و بێدەنگی کۆچ

بە گوێی منداڵدان و گۆڕدا دەچریکێنێ و

ئازارەکانی زانین مانا دەکاتەوە

شەهید پێشەوا قازی محەممەد

شەهید پێشەوا قازی محەممەد
شەهید پێشەوا قازی محەممەد یەکەم سەرۆک کۆماری کوردستان لە مێژووی گەلی کورد دا.